Chah jied noh u MB Rymbai wow man kam u CEM ka JHADC

Jowai: Hadien wa kamwa 80 sngi wa yoh CEM u Moonlight Pariat deiwa yoh u yei kyrchaan ki MDC ka Congress, UDP wa BJP, ynnin ka sngi da haap ieh noh u ya ka chuki CEM hadien wa ki MDC ka Congress waka NPP da rai ki wow krehlang wei kiwa kyrchaan ya oo da man noh ki kiwa khian paaid.

Ynne ka sngi won ha ka dorbar wa kyrpang ka JHADC kawa da mut wow wanrah ya ka No Confidence Motion pyrchah ya ka EC u Moonlight Pariat tangwa neidaw wa da ieh noh u (Moonlight) ya ka chuki CEM, u Chairman ka JHADC u Arbor Hima Darnei da e laad u ya ki MDC wow tyrwa ki yei pyrtuid u namo ki MDC wow man kam u CEM wei da e por kamwa 2 kynta wow leh ya ini.

Hadien wa pteiñ biang ka dorbar, u Chairman da pynbna u wa da tyrwa yei pyrtuid u MB Rymbai da u Ri-ioo Sten iwa kyrchaan da u Winning G Sungoh, da tyrwa leh ya i pyrtuid u MB Rymbai da u Richard Lyngdoh iwa da kyrchaan da u Hopingstone Bareh wei da tyrwa biang ya i pyrtuid u MB Rymbai da u Thombor Shiwat wei da kyrchaan u Kilometer Lytan.

Kamtæ hadien wa da tyrwa du iwi donhi i pyrtuid, u MB Rymbai da jop suk u kam u CEM wa thymme ka JHADC kawa man ka sieñ wa ar wa ksoh u ya kani ka kaam.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Neiliang ki MDC kiwa da e khublei ya u MB Rymbai kynthup ki ya u Lamdibok Sumer uwa da ong wa yooluti wow ye u wow pyndep ya ki kaam wa dang sah yong ka Council.

U Shemhok Garod won da ong u wa u MB Rymbai da slem kwah u ya ka chuki CEM wei da thooh laad u wow man CEM wei da chimkti u ya ka kaam CEM heipor wa chitom poisa bha wei u CEM warim da ha ki kajiak sngi da ye u wow leh kiwa boon ki kaam kam wow pynbait ya ki kaam Dolloi kiwa da chah pyndooh chipor.

U Thombor Shiwat won da ong u wa ym ong u wa i leh u MB toh iwa sih namo iwa bha, wei i yaknieh ya ka chuki CEM kam kiwa chah jied ha ki paidbah du kiwa kwah ya ka chuki u CEM wei ha kani ka kynti ym em katæ ka yataan wei man ko kawa suk.

Neiliang u Richard Lyngdoh da ong u wa kani man ko ka sien wa le wa da pyrchang u MB Rymbai wow yoh ya ka chuki CEM wei ha waroh ki le sien da kyrchaan u ya oo.

U Phasmon Dkhar won da ong u wa yooluti u wa u CEM u man u uwa kiñ lieñ wa stat yow lait ka JHADC wow ngam wei kamjooh leh wow kreh u neibynta kiwa kup chiliang sem chiliang.

Neiliang u Moonlight Pariat da ong u wa emkaam wow thoh cha ka sorkar jylla yow yoh ya ka bhah poisa kawa man solansar khamtam ya ki mar pohkhyndaw heiwa boon ka poisa da liat ko khamtam hawa ki truck kit ki palatpood, wei da tyrwa leh boi wow pteiñ yow man MDC deiwa paan bor naka sorkar wow pynslem ya ka Election da ka chi snem.

U CEM wa thymme u MB Rymbai won da e khublei u ya kiwa krehlang wa oo wei da ong u wa ynne ka sngi man ko kawa sahkynmoo hei rta yong oo wei da sñiawngooh u leh ya u Moonlight Pariat uwa man u bru wa chynna jngai uwa bien u ya krehlang wei da kular u leh wow wanrah ya ka kaam ka roi ka paar wei wow pyndep chna ya ka Iawmusiang Market Complex.

Ha wa khaddooh u Chairman da ong u wa kattu la soo ngut ki CEM da yoh ka Council wei da yooluti u wa daw neh uwa katni hadooh wa kut.