Jowai: U Dr. Sankey Shangpung MDC naka 29-Bataw Lakadong Constituency da chah jied u kam u Chairman wa thymme ka JHADC ynne ka sngi khlem em wa yaleh pyrchah ya oo wei da man u leh uwa khian rta dooh wa yoh u man Chairman ha JHADC.
Ya kani ka dorbar jied Chairman da pynman hadien wada e hukum da u Lat ka jylla, neidaw wa ka chuki Chairman da thylli ko hadien wa ieh (Resign) u Finelyness Bareh wei yaka kaam Chairman da pynlai chipor da u Dy. Chairman u Ailad Bhoi.
Kamtæ hadien wa u Dr. Sankey da chimkti u yaka chuki Chairman, ki kattu katni ngut ki para MDC wa kynthup nadooh u CEM u Thombor Shiwat, da e ki yei kyntien pyn-eh daw wa neini chakhmat u nangyoh u yei bor stat bor chemphang neibynta u yah yaka Council.
Neiliang ki MDC ka liang pyrchah kyntu ki ya oo wow yah wow pynlai yaka Council khlem iwon iwon i chah chiliang wei kamjooh u e bhah e bynta lang cha waroh ki para dkhot MDC.
U Dr. Sankey hawa e yei klam, pynsñiaw u yei sñiawngooh wa khroo yaki para MDC wa da e ki yei chaniah wa pura ha oo wow chimkti ya kani ka kaam, khlem iwon iwon i yaleh pyrchah.
“Ka kaam Chairman hi toh kawa emburom tam hapoh ka Council, wei wym man du kat ka burom wa khroo ya nga hi samen tangwa yaki paaid ka Constituency yong nga hi waroh kawi”. Ong u Dr. Sankey.
Da ong u wa haki chisnem tam wada lai da man i kyrkhu wa khroo ya oo kam u MDC wa thymme lyngba i yoh u embynta hapoh ka Executive Committee wa yahkhmat da u CEM u Thombor Shiwat.
“Hanla boon naphi ki para dkhot yaroh phi yei kyrdan puræ puthi yong nga tangwa nga paan maap O wa boi daw em chiboon i bakla ha nga neibhah wa man O uwa dang psiah haka kaam Politics,” da pynrap u.
Kamtæ ngait skhem u wa dei ya krehlang yong waroh ki para dkhot u nang ye chooh chooh u chna yaki Bill neibynta u pynskem yaka riti dustur. Heijooh i por leh yow ye u pynlai bait yaka dorbar yong ka Council.
“Ha-O wym ye u len wa ha kini ki sngi ka Council da chah kynthah ko haki paidbah ha kiwa boon rukom ha ki Social Media, neiliang yong nga kam u Chairman kyntu oo ya phi ki para MDC, wa to u ya chim i wa kini kiyi kiyi waroh wymtoh u pyndooh pynsiem ya i, tangwa u pynman ko ya i u nang ye i u kreh rap bha chooh chooh neibynta i bha i miat ka Council”.
