August 1, 2021
Ynne i step ki pulit ka West Garo Hills Police wa Ri-Bhoi Police da pynman ki ya i takit wa i krehlang ha chnong Umdu, Umling-Patharkhmah Road hapoh ka Nongpoh PS heiwa da chem ki ya ki tiar tympdung.
Kini ki tiar kynthup ki ya:
(1) 2.875 Kg Gelatine Stick Class-2 Explosives (23 tylli)
(2) 24 tylli ki Non-Electric Detonators
(3) Kamwa 9 meter u Safety Fuse/Cordtex
Heiyatoh wa ini da kem ya uwi u bru wa ksoh u ya kini ki tiar tympdung.
Ini man i leh man kam chibynta ka takit heiwa da kem ya ki ar ngut na Tura ha ka 23 tarik Naiynñiaw kiwa thmu wow sdang ya ka seiñ kieñ suloi wei wow rahbor ya ki bru na Tura-Dalu Road. Tangwa deiwa smat krehkaam ki pulit da ye wow pynsep ya ini i thmu yong ki.
Hadien wa kem ya kini, da phla ki wa da murieh ki ya ki tiar tympdung ha Ri-Bhoi District hajan Umling khnang wow chna bomb Improvised Explosive Device (IED) wow tympdung ha Garo Hills. Da ini i phla da yoh wow kem ya kini ki tiar ynne i step.
Heiyatoh wa ini, ka takit dang man ko kawa lai chaphrang.
