Ka kyrwoh wa da yoh na u SP ka East Khasi Hills District, da pyntip wa da yoh wow kem ya 4 ngut ki bru kiwa dawa poisa heiwa ar ngut toh ki dkhot ka seiñ HNYM.
Kani toh katkam ka ujor wa da yoh ha Madanrting Police Station ha ka 24 tarik u Naisaphra uni u snem heiwa da pyntip wa ha ka 8 tarik utai u bnai da em uwi u bru wym tipmit da Phone u cha uwa ujor heipor kamwa 7:00 waje i miet yow dawa poisa Rs. 10 lak.
Hadien katai ka sngi, uni u bru da Phone u dei langær yow dawa su ya kani ka poisa tangwa uwa chah dawa ym bien u wo su.
Neidaw wym bien u su, uni u bru wa dawa poisa deilang wa ar ngut kiwi da wan ki cha yung wa sah u ha ka 20 tarik u Naisaphra hi heipor kamwa 7:00 waje dei thmu wow lai dawa poisa tangwa neidaw wym em uwa chah dawa poisa ha yung, da maham ki ya ka khon u.
Hawa takit yeini, neiliang ki pulit ka Madanrting da yoh ki wow kem ya u Garnett Gedian Khongwir (30 snem) wa u Kyrshanborlang Lyngdoh (38 snem) kiwa man kam ki dkhot ka HNYM deilang wa ar ngut kiwi kitæ u Thounaujam David Singh (41 snem) wa u Narendra Kabrambam (29 snem).
Ka takit dang lai ko chakhmat yow tip tre yeiwa jia.
Discussion about this post