U Montri ki Kaam Pohyung ka jylla, u Lahkmen Rymbui ynne hapoh ka Yung Dorbar Chna Aiñ da khana u yeiwa yoh ki 6 ngut u yut na District Jail Jowai kiwa kynthup ya u Ramesh Dkhar, u I Love You Talang, u Marsanki Tariang, u Rikmenlang Lamare, u Shidorki Dkhar wa u Lodestar Tang iwa da jia ha ka 10 tarik uni u bnai.
U Lahkmen da khana u wa ha ki ar tylli ki Gate wa em hapoh dooh kani ka Jail da yang da ki bru ka District Prison katwa kawa em cha lait da yang da u pulit ka 6th Battalion ka MLP. Heipor kamwa 1:45 i sngi ha katai ka sngi heipor wa psiah u Warden ha ka Gate wa em khaddooh yow psiah chapoh ki thaw wa em ki koidi, kini ki 6 ngut da dat ki u Warden wei da wai yabor ki kani ka Gate deiwa yaleh leh wa uwa yang Gate wei da wai yabor ki sa ya kawi ka Gate yow poi cha pchem heiwa ha ka Gate yow mih cha lait ka Jail da em uwi u pulit wa yang uwa da siat chi kuli cha suiñ tangwa ym ye u wow yaleh wa kini ki 6 ngut kiwa da dung oo leh da ka tiar wa nep na khlieh heiwa waroh 6 ngut da yoh ki wow yut.
Ha ini wa jia 4 ngut kiwa kreh kani ka District Jail wa uni u pulit da mynsoo ki wei uni u pulit wa uwi uwa kreh da poi ki cha Hospital.
Heitatoh wa ini da Register Case pyrchah ya 5 ngut kiwa kreh kani ka District Jail wa kynthup ya u Rajesh Swer (Head Warden), Chamlan Kynjing (Warden), Damelahun Sunn (Temporary Warden), Pyndapbor Bamon (Warden), Alexius Iawram (Temporary Warden) wei da kem leh ya ki.
U Montri da pyntip u wa hadien wa thooh ki pulit ya kini, ynnin ka 11 tarik won ki bru paidbah wa em palat 5000 ngut kiwa na kiwa boon tylli ki chnong da kdong ki ya soo ngut na kini kiwa yoh u yut wei da ker kut ya ki ha iwi i khloo wa em hajan ka chnong Shangpung.
Hadien wa tip ki pulit yeini, da lai ki wut wut cha ini i thaw tangwa da khang ya ki pulit da kini ki bru paidbah heiwa ki pulit da yaleh ki wow yaklam yow yoh u lai cha ini i thaw wa jia yow khanglaad yei dat ya kini wei yow kem ki.
Da khana u leh wa ha ini da em leh ki pulit kiwa da mynsoo hawa pyrchang ki wow lai cha ini i thaw wa em kiwa chah dat tangwa da ye ki wow sai ya soo ngut kiwa ym em yongbru de wei da kit cha Jowai Civil Hospital tangwa kini waroh 4 ngut da khlaad ki chwa wow poi Hospital.
Kiwa yap toh u I Love Talang, u Lodestar Tang, u Shidorki Dkhar wa u Marsanki Tariang wei yei metyap ki da booh ha thaw booh wa yap ka Civil Hospital ha Ialong.
Uwa lait nei kti ki paidbah da suba toh u Ramesh Dkhar wei uwa ym emlang wa kini toh u Rikmenlang Lamare. Wei kini ki arngut ym pu tip cheiwon em ki wei dang thooh ya ki.
Ka Additional SP ka West Jaiñtia Hills da thung wow pynman ya ka takit wa kammon yoh kini u yut napoh Jail wei da thung ya u PK Boro, ADC ka West Jaiñtia wow pynman da ka Magisterial Inquiry heiyatoh wa ini i jooh, wa u MA Challam, MCS daw leh u yeiwa emkaam heiyatoh wa ki metyap.
U Montri da kyrpaad u ya kiwa chong chnong wym toh u chim ki ya ka aiñ hei kti yong ki yow lait u jia kamni wei wow e ya ka aiñ wow leh ko yei kaam.
