Ki pulit ka jylla, ynnin i miet ka 29 tarik, da yoh ki wow kem arngut kiwa khayi drug, wei da kem lang ki hadooh 676 Gram i drug Heroin wa chongdor kamwa T.1 klur wei ya kini ki bru da yoh wow kem deiwa ya krehlang ki pulit yong ki ar tylli ki District kitæ ka East Khasi Hills wa East Jaintia Hills.
Katkam wa pyntip u Director General of Police (DGP) ka jylla, u Dr. Lajja Ram Bishnoi da ong wa ki pulit da yoh yutip wa kawi ka Bus kawa kit ya u drug daw wan ko na Manipur cha Shillong, kamtæ ki pulit ka Anti Narcotic Task Force (ANTF) na East Khasi wa East Jaintia Hills da yang khap ki ha ki sarokbah yong kitai ki ar District, wei ini i kynreh da neh kamwa 12 kynta, wei ha i por wa kamwa 3:50 i step ynne ka 30 tarik da yoh wow ksoh ya kawi ka Bus wa em kitai ki bru ha ka thaaiñ Khliehriat wei hadien wa da kynreh da yoh khyrrup hadooh 26 tylli ki synduk sabon wa da song ya u drug Heroin wa 30 sla (Strip) u dawai kuli Nitrazapam.
Kini ki arngut kiwa da chah kem toh kiwa tip kam u Gary Kharnaior (30 snem) uwa na Mawlai Stand Bus, katwa uwi won toh uwa tip pyrtuid kam u Kmenlang Shabong (20 snem) uwa na Mawlai Mawiong.
U DGP da pyntip u wa hadien wa da takit ya kini ki arngut, da khana ki wa ya kitai ki drug da thmu wow pynpoi cha uwi u bru wa da tip pyrtuid kam u Marvin Jyrwa ha Mawryngkneng, heiwa ki pulit da lai ki wow kem noh ya oo wa 3 ngut ki lok u kiwa tip pyrtuid kam u Meibifull Buam (22 snem) uwa na Mawlai Umsaw, u Khrawboklang Kharkongor (29 snem) uwa na Mawlai Kyntonmassar wa u Aiborlang Laitmon (28) uwa na Mawlai Nongpathaw.
Neiliang u DGP ynne ka sngi da e burom u leh ya ki 36 ngut ki pulit kiwa da ye wow kem ya ini i drug deiwa tipmit kyrpang deiwa e Certificate na ka chnat pulit.
Hawa kylli, uni u heh pulit ka jylla da ong uwa ki pulit ym ye ki wow kynreh naphang ya waroh ki kari wow yoh yoh kem ya u drug, neibhah ini daw wanrah ko yei eh ya ki paidbah wa lai wa wan, lait noh du ya kitu kiwa da yoh yutip chwa ki pulit iwa da ye wow yang ya ki.
Hawa kylli heiyatoh wa i pynbaad wa ye u emkti lang ki pulit neibhah i yoh wow chalan laitlan ya u drug cha kani ka jylla, u DGP da ong u wa hadooh katni ym pu yoh ya kawon kawon ka ujor wa emkti ki pulit, tangwa da pynrap u wa lada chem wa ki pulit leh ki emkti ki, ka pynchitom daw man ko kawa rap eh ya kam kitæ.
Ha iwi i liang, u Dr. Bishnoi da ong u wa toh sakhiat wa ki bru paidbah rap kynrandien ki wow wan chakhmat wow man kam kiwa sakhi hawa yatoh wa ki kaam drug neibhah wa ki hap ki wow lai chadooh Kachari man-i-por, tangwa da ong u leh wa ka chnat pulit daw pyrchang ko wow yaklam wa ki bor ka Kachari yow pynbait ya kam kini yow lait i eh ya ki bru paidbah, heiwa da ong leh wa cha kiwi ki ri da jooh e leh dei su ya kitu ki bru.
