Kawi ka bru, u chan ko wa uwi u bru wa e nong wow tynyap pyn ya u kurim da chah kem ki hadien wa soohbuit ki wow tynyap ya oo ha Katihar, Bihar, da ong ki pulit.
Ya u kurim da tip kam u Dev Kumar Gunjan, uwa man u Technician ha Bihar Electricity Department wei kreh u ha Jamui, heiwa da chah siat u ha Badla Ghat, Khagaria District ha ka 11 tarik uni u bnai katwa dang lai luti u da ka rel wow yachem wa ka kurim, ka Samita Kumari kawa man ka Motor Vehicle Inspector ha Supaul. U Dev da yap noh u hadien kattu katni sngi ha Hospital.
Ki pulit da ong ki wa nei takit da chem wa ka Samita ya maya ko wa u Ajit Kumar, uwa kreh kam u Technician ha Nalanda wei da kheiñ ki wa u Dev man u kam u moochynthut hapyrdi yong ki kamtæ da pyrkhat ki wow tynyap noh ya oo.
U Superintendent of Police (Rail) ka Katihar, u Hari Shankar Kumar da ong u wa ki ar ngut da e nong ki ya u Raju Kumar wa sin kam u Dheeraj wow leh yeini.
Da ong u wa hawa takit, u Ajit da phla u wa ya maya u wa ka Samita wei i wit ki toh ya u Dev. Kamtæ da e nong ki ha u Dheeraj wow tynyap ya oo katwa dang lai luti u da ka rel.
Ki pulit da chim ki leh ya ki Mobile Phone wa SIM Card kam ki sabut.
U Dheeraj toh uwa da jooh chah kem nachwa ha u 2025 hapoh ka Arms Act chwa wow yoh jamin u.
I takit dang lai i chaphrang wow tip lada emkti kiwi.
U Dev wa ka Samita da bia ki ha u 2018 wei da em ki ya ka khon wa 5 snem.
Discussion about this post