Hadien wa da poor iwi i Video wa pynyoo ya kawi ka kari Pickup kawa da chah pynsangeh ha uwi u pulit ha Nongthymmai, Shillong tangwa da thmu ko lymbub wei wow yooh ya uni u pulit heiwa ki arngut (uwa yah wa uwa yarap) nyngkong da yania ki wa uni u pulit tangwa hadien da psiah ki hapoh kari deiwa lai bait hanla u pulit dang yieñ u hakhmat ka kari.
Neiliang ki pulit da pyntip ki wa kini ki arngut toh kiwa da thmu wow yooh da ka kari wa ya u pulit ha ka 31 tarik u Naisan heiwa ka kari toh kawa em Number ML05-T-8200 kawa da chah pynsangeh ha u Dwustar Lyngkhoi, Madanrting Traffic Branch neibhah kani ka kari da wan ko neiliang wym chah wei da pynthut ko yei lai i wan ki kari wei hadien wa da yaklam wa uni u pulit da psiah ki hapoh ka kari wow lai bait hanla u pulit da pyrchang u wow pynsangeh wei hadien ini uwa yarap da hiar u wow tba kti ya uni u pulit.
Kini ki arngut da tip kam u Johnyrias Marboh (uwa yah kari), uwa na Upper Nongrah wa u Augustin Marboh (uwa yarap), uwa na Nongrah Umjapung wei da chah pyngat ki ha ki kyndon wa tba kti ya u chakri sorkar dei thmu wow pynthut yei kaam yong oo wei wow pynmynsoo.
