Ha ka 8 tarik uni u bnai, da em wa pyntip cha ki pulit ka West Garo Hills wa em uwi u bru wa pynemkaam ma pynemkaam ya ki kor ATM deiwa pynemkaam chibet da kawi chibet da kawi ka Debit Card.
Kamtæ ki pulit ka Phulbari Police Station da lai kem ki ya uwi u bru wa tip kam u Lotiful Islam uwa na ka chnong Tumni, South Salmara, Assam wei na oo da chem 44 tylli ki Debit Card ka HDFC Bank, kawi yong ka India Post Payments Bank wa kawi yong ka SBI.
Da chem leh na uni ya 44 tylli ki Envelope wa phah Debit Card ka HDFC Bank kiwa da dep wai u, kawi ka Passbook ka SBI wa kawi ka Passbook ka India Post Payments Bank wei da kem ya ka poisa wa T. 10,290 na uni u bru deilang waka Scooty wa em Number AS-18H-7723 wa ar tylli ki Mobile Phone.
Hawa takit ya uni u bru da chem wa kreh u hapoh u Assistant Branch Post Master ka Tumni Post Office, South Salamara, Assam uwa tip kam u Ashraful Islam uwa na Baro Ravatary, South Salmara, Assam.
Kamtæ ya uni u Ashraful Islam da phah wan mih ya oo ha Phulbari PS heiwa da khana u wa yei kaam Post Master da leh da oo wei da e u leh wow yei kaam u da u Lotiful Islam wei ini da man ko pyrchah ya ka aiñ deiwa thung ya u Lotiful wow leh yei kaam u.
Da suba wa kini da wai ki ya ki Envelope wa phah Debit Card ki Bank cha ki bru wei da sai poisa ki deiwa pynemkaam ya u PIN wa da e lang hapoh ka Envelope.
Neiliang ki pulit da kem ki ya kini waroh arngut wei ka takit dang lai ko chakhmat.
