Ha ka Dorbar Lyiur wa chi sngi yong ka Jaiñtia Hills Autonomous District Council (JHADC) kawa da pynman ynne ka sngi da chim yaka rai u pyrchah yaka Uniform Civil Code lyngba ka Resolution wa da wanrah da u Chief Executive Member, u Thombor Shiwat.
Hajrong kani ka Resolution da kyrchaan lang leh da waroh ki dkhot yong ka yung dorbar chna aiñ ka JHADC wa kynthup ya kiwa em naka liang pyrchah.
U CEM hawa wanrah ya kani ka Resolution ong u, “Wym tip hadooh katwon mut thmu ka sorkar bei u wanrah ya kani ka Uniform Civil Code, wei katwa tieñ ya chahktah, neitæ i daw kam ka dak u pyrchah da wanrah i ya kani ka Resolution neibhah wym kwah i wa ka Jaiñtia Hills Autonomous District Council u chah ktah ko kamjooh leh ki jaitbru u dooh ki yei hok næ i bor wa da pynkup da ka Paragraph 2 yong ka Sixth Schedule hadooh katni kitæ toh yow yada wei pynneh pynsah yaka dustur riti kawa da jooh sikai nadooh ki por nachwa”.
U Andrew Shullai uwa yahkhmat ka liang pyrchah hawa klam ong u emkaam u pynkhlan chooh chooh ya ki aiñ wa da em chwa haka Council khnang wa kiwi ki bor wym yoh kabu ki u wan knieh.
Hajrong i kyrchaan yong oo yaka Resolution, da e yumut won u yaka Executive Committee wym toh u phah cha ka Law Commission da kani ka Resolution, tangwa u thoh thij pa thij ya ki kyndon hajrong i pyrchah yaka Uniform Civil Code najrong u pynyoo nongmuna leh ya ki aiñ ki dustur riti wa da jooh myllien u leh ha thaiñ yong i, wei hajrong kini ki yurim toh u kyrpaad pynlait ya i naka Uniform Civil Code.
Kiwi won wa chimbynta u klam yow kyrchaan ya kani ka Resolution kynthup u Brightstar Chyrmang, u Winning G Sungoh, u Lasky Rymbai Dy. CEM, u Holando Lamin, Phasmon Dkhar, A.H. Darnei wa kiwi.
