theme-sticky-logo-alt
theme-logo-alt
Advertisement ad1

Chah kem ki chi yung kiwa na Shillong wa khayi ksiar tooh

Advertisement ad1

Ka Directorate of Revenue Intelligence (DRI) da yoh ko wow kem ya kiwa khayi ksiar kiwa krehkaam na Shillong heiwa da yoh leh wow kem 1.16 Kilo i ksiar wa chlan tooh na Bangladesh chapoh India deilang waka poisa wa T. 57.70 lak ha ka 25 tarik uni u bnai ha Guwahati.

Da kem ya 6 ngut ki bru wa kawi ka kari wei 4 ngut na kini toh kiwa naka jooh ka yung wa kyntup ya u pa, u Biolet Dura (71 snem) ka khon u ka Proficiency Diengdoh (32 snem) kiwa sah ha Raimohan Lane, Wahingdoh, Block V, Shillong, East Khasi Hills, u khon u u Adrian Diengdoh (20 snem) waka pyrsa kurim u ka Saphiwanphylla Lyngdoh (19 snem) kiwa waroh ar kiwa sah ha Nongmynsong, Shillong.

Hadien wa yoh yutip da iwa tikna, ka DRI Guwahati da booddien ki yei lai i wan kini kiwa chi yung kiwa wan na Shillong hei janmiet ka 25-03-2022 ha ki bynta ka Lalganesh, Guwahati heiwa da tip wa daw lai dai ksiar ki ha iwi i yung wa em hajan ini i thaw.

Heipor wa lai kini ki chi yung da ka kari cha ini i yung yow lai dai, da pynsangeh ya ki wei da chem T. 57.70 lak ka poisa wa da murieh hapoh ka Cushion Cover da kiwa thied ksiar kitæ u Prasanjit Aditya wa u Pandu Pal Aditya kiwa waroh ar na Baksa District, Assam.

Waroh da yoh wow kem 10 tylli ki Gold Biscuits naka Proficiency Diengdoh, ka Saphiwanphylla Lyngdoh wa u Adrian Diengdoh kiwa da murieh bha hapoh ki sula poh wa sap ki deiwa soor bha kam ki kata. Waroh 6 ngut da kem ya ki wei kattæ da chah ksoh ki ha ki pulit.

Da antaad wa chi bhah na ka ynru bhah i ksiar wa psiah chapoh ka India toh kiwa dei chalan tooh. Ka India da wanrah ko 800-850 Tonnes i ksiar man-u-snem tangwa iwa emkaam won toh 1,000 Tonnes. Ini mut wa 150-200 Tonnes i ksiar toh iwa da wanrah tooh chapoh ka ri man-u-snem.

Ha u snem wa da dep, ka DRI Guwahati Zonal Unit deilang wa ki Regional Unit ha ki jylla North East da dep kem ki 208 Kilo i ksiar iwa da chongdor T. 102.6 Klur kiwa da wanrah na khappood Indo-Myanmar wa Indo-Bangladesh.

(Feature image for representational purpose only)

Advertisement ad1
Share this:
Previous

Ym toh u kyntait ya ki poisa naar, pynche ka SDO

Next

Du uwi biang wa yoh COVID-19 ha Meghalaya