U Deputy Inspector General of Police (Eastern Range) ka Meghalaya da pyntip u wa ki pulit ka Meghalaya da tip ki deiwa tikna wa da em wa seiñ ya ka seiñ kieñ suloi wa dang thymme kawa da e pyrtuid “National Liberation Council of Nongkyndong” (NLCN) kawa da sdang da ki khynroo kiwa na Khasi wa Jaiñtia Hills dei thmu wow sdang thma pyrchah ya ka sorkar.
Kini da thmu ki leh wow thied tiar yasiat, ki kuli, u dawa poisa na ki bru, u khut bru wow psiah cha ka seiñ wei wow e sikai ki wow pynemkaam ya ki tiar yasiat wei wow booh leh ya ka ktem yong ki yow leh ya ki kaam pyntieñ pynsmiej yaka imlang sahlang.
Ki pulit da chem ki leh wa kani ka NLCN da ya kdoh ktien ko wa ki seiñ kieñ suloi wa em ha Nagaland wei ki bhah wa nyngkong ki bru namo ka 1st Batch wow phah sikai yei pynemkaam tiar yasiat da toh u mih ki yow lai cha Nagaland ha ka 17 tarik uni u Naisaphra.
Hadien wa tip yeini, ki pulit da thooh ki yow kem ya kini nadooh ynne i step ka 16 tarik heiwa da yoh wow kem ya 7 ngut na kiwa boon ki thaw ka Khasi wa Jaiñtia Hills heiwa uwi toh uwa dang hapoh 18 snem uwa da yoh wow kem da ki pulit ka East Khasi Hills District.
Ya kini da pynngat mukotduma ha ka Crime Branch Police Station, Eastern Range, Shillong hapoh kiwa boon ki kyndon ka Indian Penal Code wa hapoh ka aiñ Unlawful Activities (Prevention) Act.
Kini kiwa chah kem ka NLCN toh u Chairman, u Commander in Chief, u General Secretary uwa man leh u Area Commander ka West Khasi Hills, u Area Commander ka Jaiñtia Hills, u Recruiter & Record Keeper wa 3 ngut ki chipai khian.
Hadien wa lai kynreh ki pulit ya ki thaw wa kem ya kini, da chem ya ki kot ki sla kam ki sabut, ki Mobile Phone wa kiwi de na kini wei i thooh ya kiwi ki dkhot ka NLCN dang pteiñ i.
Discussion about this post