Hadien wa mih khubor wa ka GNLA da yoh ko ya uwa yahkhmat wa thymme da u Jingjang D. Shira wow man kam u Chief Executive Director wei da em leh kamwa 500 ngut ki dkhot ka GNLA kiwa da yoh yei sikai ha Rengdim wa em ha khappood ka West Khasi Hills, East Garo Hills wa South Garo Hills District wei deilang waka khubor, da poor leh ki dur ha WhatsApp wa pynyoo yei dur u Jingjang deilang wa kiwi ki arngut. Uwa da kup ya ka Towel wa yirngam da tip kam u Nengsrang Sangma uwa man kam u GNLA Secretary wei kamjooh u Second In-Charge katwa uwa tymmoh yei dur wei sap sula chipai toh u Jingjang.
Hadien wa pynman ki pulit ya ka takit deiwa tip chaphang ini, da chem wa ki bru wa em hei dur toh u Namchang Ch Momin uwa tip leh kam u Jingjang D Shira (22 snem) uwa na ka chnong Darangagre,, West Garo Hills, u Adot M Sangma (26 snem) uwa na Ganipara, West Garo Hills wa u Silwit R Marak (26 snem) uwa na Nalnapara, West Garo Hills wei kini ki chnong toh kiwa dang em hapoh ka Dalu Police Station.
Kamtæ ki pulit da lai kdong ki ya kini ki bru wei heipor wa dang em ki ha luti wow lai cha chnong Darangagre da pyntip cha ki da ki pulit ka Kherapara Out Post wa kini ki le ngut da wan pyndem ki, kamtæ da lai cha kani ka Out Post yow takit ya kini ki bru wei hadien ini da lai kynreh yei yung wa sah u Jingjang wei da chem ya ki riam chipai (Camouflage Uniform), ki Boot wa kiwi kiwi de.
Ki pulit da pynche ki wa kini ki 3 ngut wa da yoh kem ymtoh kiwa pynkhai im biang ya ka GNLA wei da leh ki yeini du wow pynsier mynsien ya ki bru yow yohlaad ki wow dawa poisa na ki mahajon wei da suba wa dang em kiwi leh kiwa embynta ha ini i thmu wei dang thooh ya ki.
Chooh chooh ki pulit ka Meghalaya da ong ki wa da leh ki katwa ye yow pynsangeh ya iwon iwon i pyrchang ki seiñ kieñ suloi wow pynkhai im biang, kamtæ da kyrpaad ya ki paidbah wa lada tip ki chaphang kam kini ki kaam wow pyntip wut-wut cha ki pulit wei yei pyrtuid kiwa pyntip daw murieh.
