Hei janmiet ka 18 tarik uni u bnai, ki soo ngut ki bru wym tipmit kiwa rah Pistol da wan ki da kawi ka Aprilia Scooty wa em Number AS-18J-0181 wa kawi ka Bajaj Pulsar 220 (rong yong) kawa em Number AS-18E-7925 wei da lute poisa ki na ki ar ngut ki bru deiwa pynyang Pistol heiwa da yoh ki wow rah Rs. 80,000 na kini deilang ki kot ki sla wa ar tylli ki Mobile Phone.
Pyn ha kani hi ka janmiet kiwa chong chnong ka Beldongpara, PO Choto Matia, PS Krishnai, Goalpara, Assam da yoh ki wow ksoh ya kani ka Pulsar manda poi ko ha kani ka chnong, tangwa uwa yah thuk-thuk wa uwa chong hadien da yoh ki wow yut dei kjat.
Ya kani ka Pulsar da e kti cha ki pulit ka Mendipathar wei ha ka sngi wa bood ha ka 19 tarik da yoh FIR na kiwa chah lute kiwa da wan ha Mendipathar Police Station, kamtæ da thooh ya kini kiwa lute hei yahkhmat u DySP, Special Ops wa ki pulit ka North Garo Hills D.E.F.
Ha ka 24 tarik ki pulit da yoh ki wow kem na Assam ya u Sunil Boro (33 snem) uwa na Upper Borgum, PO/PS Dudhnoi, Goalpara, Assam deiwa yarap ki pulit ka Dhupdhara PS wei da chem leh ya ka Scooty wa pynemkaam hawa lute bru.
Hawa takit ya u Sunil da khana u wa kiwi kiwa emkti toh u Kaltu Rabha, u Turti Basumatary wa u Sahadev Basumatary kiwa waroh na thaaaiñ Dudhnoi, Assam.
Neidaw wa joor i thooh ki pulit ya kini, ynnin ka 1 tarik, u Turti Baumatary da wan pyndem u ha ki pulit ka North Garo Hills Police deiwa rah lang u ya kawi ka Semi-Automatic Pistol kawa e mar tylli ki kuli wei deiwa yah u da lai kem ya u Sahadev Basumatary na khappood ka Assam-Meghalaya hajan Tikrikilla, West Garo Hills.
Ki pulit dang pteiñ ki wow thooh sa ya uwa dang yut wei da chem leh wa kini toh kiwa da myllien bha wow lute bru ha khappood ka Assam wa Meghalaya.
Discussion about this post