Sa uwi u heh ka seiñ ACHIK uwa da chah pynbaad kam kiwa sdang pynawri ha ka 24 tarik u Naiynñiaw heipor wa chah hiar thma ka Chief Minister’s Secretariat wa em ha Tura heipor wa man yalang u Montri Rangbah ka jylla u Conrad K Sangma, da kem ya oo ynne na ka thaaiñ Samanda ka East Garo Hills.
Uni u heh ka ACHIK kamjooh ka Garoland State Movement Committee toh u Balkarin Ch Marak uwa da chem wa rieh u ha iwi i yung ha chnong Bansamgre, ha u sarok warim ka Tura-Williamnagar Road wei da kem ya oo dang step ynne da ki pulit ka West Garo Hills wa na East Garo Hills.
Da wanrah ya oo haphrang ka yung bichaar wei da rai wow phah kset ha kti ki pulit ar sngi.
I kem ya oo toh hadien 39 sngi wei hadien wa chah kem sa uwi u heh ka ACHIK, u Labenn Ch Marak ha ka 17 tarik u Naisaphra. U Labenn toh uwa jooh man leh kam u DSP wa u sahep sorkar nachwa wei uwa yaleh Election MLA u na Tura pyrchah ya u Conrad Sangma ha uni u snem.
Katni dang sah wow kem su ya ka General Secretary kawa man leh ka muktiar, ka Bernita R Marak.
Kini ki 3 ngut toh kiwa da chah pynngat hapoh ka aiñ Unlawful Activities Prevention Act wei da lai ki hakhmat ka High Court yow paan ya ka Anticipatory Bail tangwa da kyntait yeini wei hadien ini kini ki 3 ngut da lai rieh ki.
Discussion about this post