Uwi u heh spah na Guwahati da chah kem u ha ki pulit hadien wa poor i Video wa pynyoo wa khawai sngikha u hajrong ka yingkieñ Kumar Bhaskar Varma Setu iwa pynchrai ya kiwa boon khamtam wa pynthut u yei lai kari.
Ya uni u heh spah da tip kam u Gautam Baruah wei da khawai u neidaw wa sngikha ka kurim u.
Ha i Video da yoo wa siang ya ka Carpet rong soo ha ka Flyover wa kiwi ki pynriam wow lehkmen chipor ya ka sngikha deiwa pynthut yei lai kari.
Ki Video wa ki dur neini da poor ki Online heiwa kiwa boon da kylli ki kammon ye u pynemkaam ya u sarok neibynta ki kaam samen.
Hadien ini ki pulit ka Bharalumukh Police da kem ki ya u Baruah deiwa Register ya ka Case No. 79/2026 hapoh ki kyndon 125/285/270 ka Bharatiya Naya Sanhita (BNS) wei da ksoh ya ar tylli ki kari wa em Number AS-01GH-0003 wa AS-01GK-0772 ki yong u Baurah.
Neiliang ki pulit dang pynman ki yei takit hajrong ini wow chem lada em kiwi kiwa emkti ha ini i kaam.
Discussion about this post