U MLA ka AITC uwa man leh u montri ka chnat Puræ Puthi ka West Bengal, u Partha Chatterjee chirup wa ka Arpita Mukherjee kawa man wa yajan (Aide) wa kani ka party da chah kem noh ki ha ka Enforcement Directorate (ED).
Ini i chah kem kini ki ar ngut toh hadien wa lai kynreh ka ED ya i yung ka Arpita ynnin ka sngi heiwa da chem ka ED ya ka poisa hadooh kamwa T. 21 klur wei kani ka poisa kynthup ko ya ki kot poisa T. 500 wa T. 2,000.
Da suba wa kani ka poisa toh kawa da chim tooh neibynta i thung kreh ya kiwa sikai skur ha ka jylla West Bengal wa pynman da ka School Service Commission (SSC).
Heiyatoh wa ini neiliang ED dang pynman ko ya i takit wow chemdien yeiwa sakhiat waroh.
