Ki pulit ka Mizoram da kem ki ya uwi uwa yalap niam uwa tip kam u James Lalramliana uwa da kam leh pyn ya idæ kam uwa ye wow leh ya ki kaam bah u Blai heiwa da kem ya oo hadien wa kawi ka khynnah kynthai kawa na i chnong Sailutar da pynbaad ko wa da ksoh bor u ka.
Katkam ka khubor wa da mih na Sailutar, kawi ka khynnah kynthai da phla ko wa u James Lalamliana uwa da wan yalap hapoh ini i chnong da boon bnai, da wan pynjooh u wa kani ka kynthai wei da jooh pyndih kiad haroh u ka. Hadien wa mih ini i phla wa da pynkhyrngiat ya kiwa boon, da booh ya ka FIR ha Darlawn Police Station, heiwa ka Dorbar Chnong ka Sailutar da beh chnong ko pyn ha ka jooh ka miet deiwa maham leh wym toh u wan yooh kjat de u James hapoh ka chnong.
Ini i ksoh bor ya kani ka khynnah da jia i heipor rukom yalap u James iwa rap khyllah heiwa ya ki khynnah wa dang khai khynroo da phah chong lang ya ki hapoh ki yungmane 40 sngi. Da pynbaad wa u James da khut u wow wan ki cha oo hapoh i thaw wa khut u kam i thaw wa kyntang.
Kani ka khynnah kawa da wan chakhmat da ong ko leh wa u James da maham u wow pynyap ya kiwa hayung ko da i bor Blai lada ym leh ko katwa ong u. Kani ka khynnah da phla ko ya ini heipor wa pynman ya ka yalang dawai Blai heiwa kani ka khynnah da pynmih ko ya ini wa jia neidaw wym ye de wow murieh wa sñiaw pap ko.
Neiliang ki pulit ka Darlawn da kem ki ya u James ha ka 6 tarik uni bnai na Aizawl.
U James Lalramliana man u leh uwa yalap Blai cha rood sarok wei da sah miet u ha Sailutar deiwa kam wa daw poi ka duwan u Elijah. Da em leh boon ki bru wa ngait ya oo ha Sailutar wei kiwa da yada ya oo nachwa leh kut wa mih kiwon kiwon ki pynbaad pyrchah ya oo. Nyngkong da yut rieh u hapoh ka thaw wa pynman yaseiñ khynnah wei hadien won ha i yung wa e da kiwa bood ya oo.
Da boon leh kiwa kam wa u James da leh u ki kaam bah kam i pynkylla Wine ya ka um tangwa ymem ye u wow pynkhai im ya uwa da yap iwa da pynkhyrngiat ya kiwa boon.
Ha ki snem wa da dep, da mih boon kiwa pynsñiaw yei khuslai ya ini rukom yalap Blai u James.
