Uwi u bru wa 43 snem i rta da chah kem u haka 13 tarik uni u bnai uwa na Ahmedabad deiwa chah pynbaad wa pynpoor u ya iwi i Video ha Facebook deiwa yahbakla ya ki paidbah yeiwa klam u Prime Minister Narendra Modi heiyatoh waka Reservation namo ka booh bhah yei kreh.
U Mahendra Dodiya (43), uwa chong chnong ka Odhav, Ahmedabad da chah kem u hapoh ka kyndon wa chna thok (Forgery), i pynchit wei pynyachoon paidbah heiwa ka Ahmedabad Cyber Crime Branch da chemdien ko ya oo lyngba ka Facbook Account kawa da pynpoor ya iwi i Video heiwa u Modi da klam u da ki kyntien u Prime Minister warim, u Jawaharlal Nehru.
Ini i Video toh heipor wa puræ u Modi yaka chithi wa thoh da u Nehru hapoh Rajya Sabha haka 7 tarik haka tayaaw wa dep tangwa uwa pynpoor ya ini i Video da kam u wa ini toh iwa da ong u Modi ki kyntien.
Ka chithi wa puræ u Modi toh yeiwa ong u Nehru wym em sñiawsuk u ya kiwon kiwon ki jait Reservation khamtam hei kreh neibhah pynswe ko ya ki bru wow yaleh yow ku chaneiñ. Wei ini i Video da kam wa ini toh i sñiaw yong u Modi heiyatoh waka Reservation tangwa hei yong sakhiat u Modi da kwah u wow ong wa ka Congress man ko pyrchah yaka Reservation.
Ya uni u bru da kem hadien wa u dkhot ka BJP da ujor u pyrchah ya oo haka 9 tarik uni u bnai wei ini i Video toh iwa dang em ha Facebook Account yong u ‘Solanki Kaushik Bhai’, iwa da Edit heitæ i rukom wa pynyoo donhi ya ki kyntien wa klam u Modi wa da thoh da u Nehru khlem da pynyoo na wa sdang iyi wa jia heiwa da kam wa da ktah i yei pyrtuid u Modi.
Da pyntip ki pulit wa uni u bru toh uwa jooh man kam u dkhot ka APP tangwa da mih noh u hadien wym yoh Ticket u yow yaleh yaka Municipal Corporation Election.
U Dodiya da chah pynngat u haka Indian Penal Code (IPC) Section 153 (A), 469 wa 505.
Discussion about this post