Jowai: Da ki spah ngut kiwa chong chnong ka Thadmuthlong wa kynthup ya ki soo Dorbar Chnong kam ka Dorbar Chnong Thadmuthlong A, B, C wa Muthlong Rim hapoh ka lama yong ka Synjuk Rangbah Shnong Thadmuthlong Pyllun (SRSTP) ha kani ka 6 tarik da mih paidbah ki chynrang wa kynthai wow lai khang tylla ya ka Shangpung College neidaw wym mih pyrtuid ka Thadmuthlong-A ha ka thaw wa em ko namo kawa tip hei ktien para kam ka ‘Address’ yong ka Shangpung College, ha i thawa wa da chna ya ka.
Ha chwa wow lai khang tylla ya kani ka thaw puræ, da em ka yalang dorbar ha madan ka skur sorkar wow ap u sñiaw ya i sur yong ki paidbah wei ha katai ka Dorbar da rai wow khang tylla noh ya ka Shangpung College.
Ha chwa kani u Secretary ka SRSTP, u E. Lyngdoh da pynsñiaw u ya ka chithi wa da phah da ka Shangpung College ha ka 5 tarik uni u bnai kawa ong wa ka College da pdiang ko yeiwa dawa ka Synjuk hei yatoh wa ka Address tangwa kani ka kaam dang sah ko wei lada kani ka kaam u man ko kamni daw kyrriah thaw noh ya kani ka College cha iwi i thaw.
Hadien ini ka dorbar ki paidbah da mih ki khrui nadooh na madan skur sorkar wow lai paidbah yow poi ha pchem ka ka Shangpung College deiwa rah ya ki lama rong yong yow pynsniaw yei pyrchah yei wym mih pyrtuid ka chnong ka Thadmuthlong ‘A’ kamwa da yakut ha ka NOC wa chim chwa wow sdang ya ka College.
Yow pynbait ya kani ka kaam ka SRSTP, da khut ko ya ka Joint Committee ka College yow yaklam neibhah ka soskular wa da tyngkheiñ wym em bood ya ki kyndon ka NOC tangwa kiwa pyllai ya ka Shangpung College ym em wan ki cha khmat wei da pahah pathan ki da ki soo ngut kiwa man kam ki khynnah hakhmat ka Committee yong ka Synjuk da pyntip ka Synjuk.
“Lada kiwa pyllai ya kani ka College ym em ki i sñiaw wow chakri ya ka pateiñ lyngba i puræ puthi katkam wa angnood yong i, toh u lai ki da ka luti kawa bha khnang wa kiwa hadien ye ki u saiñdur ya ka mynried ka mankawi ka imlang sahlang” da pynsñiaw ka SRSTP.
Discussion about this post