Ki khubor wa da mih na Assam da ong wa kiwa chong chnong deilang ki seiñbhalang da ksoh ki ya 14 tylli ki Truck wa kit mooyong ha Balijan wa em hajan ka chnong Dergaon ka Golaghat District deiwa pynbaad wa kini ki Truck toh ki wym em ki kot ki sla wa biang wa toh u yoh ki na ka sorkar.
Ki dkhot yong ka seiñ Krishak Mukti Sangram Samiti wa ka Chatra Mukti Sangram Samiti da kah ki ya ki sarok heiwa da pynsangeh ki ya kini ki Truck kiwa wan luti na Meghalaya yow lai cha Tuli Railway Station wa em ha Nagaland heiwa ym tip wa lada u mooyong toh uwa na Meghalaya lane na kiwi ki thaw.
Kini kiwa yah Truck da khana ki wa ki malik yong ki da phah ki wow sangeh ki ha Balijan neidaw wym em Transit Challan ki, kamtæ ki dkhot kini ki seiñ da pyntip ki cha ki pulit heiwa da dawa ki wow pait ya ki kot ki sla kini ki kari.
Kini ki Truck da pynemkaam ki da u sarok PHCG Road lyngbha ka Golaghat wei da chah ksoh ki ha Balijan iwa jngai kamwa 5 Km na Dergaon Chariali.
Ki pulit da wan ki hadien kamwa 30 minit iwa da pynchrai ya kini ki seiñ hanla em ka Police Station du 5 Km donhi heiwa ki pulit da pynuiñ biang ki ya kini ki Truck cha Meghalaya iwa da pynchrai biang ya kini ki ar seiñ heiwa ki da kwah ki wow kem ki pulit ya kini ki Truck.
U MLA ka Sivasagar, u Akhil Gogoi da kyntu u ya u CM ka Assam deilang u DGP ka jylla wow pynchitom ya ki bru wa emkti ha kini ki kaam pyrchah aiñ deiwa kylli leh ileh wym kem ya kini ki Truck heithaw wow pyndong ki.
Neiliang won u OC ka Dergaon Police Station da pynche u wa da pyndong ya kini ki Truck yow lait u mih i kulmar neibhah wa da yoo wa da chrai ki paidbah deiwa pdiang leh wa i pait ya ki kot ki sla toh i kaamram ki pulit.
Ki dkhot kini ki seiñ da kyntu ki wow pynjoor ka sorkar yei kynreh ya kini ki kari ha kylleñ ka Golghat District neibhah da pynemkaam ya ki luti syngkieñ yow kit mooyong khlem da biang ki kot ki sla.
Ini toh iwa da jia hei miet ka 10 tarik uni u bnai.
Discussion about this post