U Vincent H. Pala kam u kyrtong ka Congress neibynta ka Election MP Lok Sabha chiteiñ samoi cha ka Shillong Parliamentary Constituency, hei janmiet yong ka 10 tarik uni u bnai da wan hiar u ha Ladthadlaboh, Jowai neibynta u paan kyrchaan na ki paidbah hei emlang u MP warim ka Rajya Sabha, u Dr. Wanweiroi Kharlukhi, ki MDC ka JHADC, u Madonbai Rymbai wa u Rikut Parieñ, neitæ u E.C. Boniface Bamon MLA warim, u Emlang Laloo u kyrtong MLA ka Congress na Nartiang Constituency wa kiwi de.
U Vincent hawa klam ong u wow jied ya uwa mihkhmat ha kani ka Election toh u pyrkhat leh kawa kammon ka Party, uwa kammon u bru wa ye u e yada, uwa ye u e i kylla wa bha, uwa ye u e yei roi i paar, uwa ye u e ya ka mynried ki khon ki kti khnang yow lait nei jynjar.
Hawa kynthoh yei synchaar ka BJP hapoh ka ri, ong u i wanrah ko ya ka Foreign Contribution (Regulation) Amendment Bill toh iwa sih tam neibhah da thmu knieh noh ko yei hok ki paidbah Christan ha waroh ka ri India kiwa em da ki lak klur ngut, i yoh i kot ki næ ki hok nadooh ki thaw puræ, thaw sumaar, thaw ri khonswet wa kiwi.
Ong u waroh chi kattu i chah lehbeiñ ki Christan hapoh Bengal, Rajasthan, Madhya Pradesh, Odisha wa kiwi pynsñiaw hi-eh i yei wyrai khlem poi pyrkhat wa daw wan jia i chah lehbeiñ ha i leh.
“Ka Congress ym em ko ya ka FCRA næ yoh poisa na baar tangwa yieñ pyrchah i yeini toh wow yada i ya ki khian paaid ki Christan,” da ong u Vincent.
Najrong kani ong u dang em sa kawi ka Bill wa pynkreh ki nadien, katæ toh ka Freedom of Religion næ Anti-Conversion Bill, heiwa na i em 24 tylli ki jylla ha ka ri lada chiteiñ na ki mynjur ki ya kani ka jooh ka Bill, iwa mut ha waroh ka ri India da krehkaam hi ko.
Ya kani kamwa man kattæ ong u la 12 tylli ki jylla wa da mynjur ka wei sah sa du 2-3 tylli ki wym pu em.
Kani ka Bill ong u em ko ar bynta kawi yow knieh ki yei yoh i kot wa i hok mantre, kawi won u khanglaad yei kaam yalap.
Wei na ka Record kawi ka Committee ki Christan hapoh ka India kawa pait yow yada hawa chah kem ki phadar, ki sister wa kiwa yalap ha kylleiñ, da em hadooh 754 ngut kiwa yalap næ bru niam wa chah kem ha ka chi snem lyngba kani ka Anti-Conversion Bill wei kam ini ym pu jooh jia haka History ka India.
Kani ka Bill pynrkhiñ haroh ko wa toh u paan por chwa 60 sngi lada kwah u Baptist næ pynkylla niam wei lada em wa tyngkheiñ ka kuna ma ko Rs. 10 lak wei 10 snem u chah kset patok, neitæ ym e laad ko leh u pynbia chong kurim da ki bru niam heiwa toh u leh da ki bru sorkar.
U Vincent da pynrap haroh u wa heiyatoh wa i hiar pateiñ ha ka dustur yong i neibynta ka spah ka phaw wa i em ka yung ka sem waroh toh ha ka khon kynthai wa khaddooh, ha ki Hindu won toh u yoh u khon chynrang wa nyngkong, deiwa booh yukylli leh wa lada daw bood yei rukom pynlai ki Hindu ne yong ki Christan, ki Tribal næ yong ki Brahmin.
Ong u ini waroh toh i thmu yong ka BJP wow pynman yaka ri India kawi ka ktien iwi i ngait, wei iwa rap maa chooh chooh toh wa kiwon kiwon ki Hindu ST lane SC lada kylla Christan ki daw dooh noh ki yeini i hok.
Pynrap u wa hei sakhiat ha ka By-Election ym da emkaam ware, tangwa neidaw kini ki Bill waroh, emkaam yei yada khamtam ya ki Christan, kamtæ kyntu u ya ki paidbah wow jied ki ya oo neibhah du ka Party Congress hi kawa bien u e yada.
Da pynkynmoo haroh u wa heiyatoh wa ka CAB, heiwa ka Party NPP lyngba u Conrad Sangma nyngkong yieñ u wow pyrchah tangwa manda pyntieñ ka BJP won e ko yei kyrchaan.
Hawa khut kyntu kyrpaad ya ki paidbah wow jied ki ya oo, ong haroh u wa kam ki paidbah ymtoh u chah pynbiej wei ngait kulmar hei batai ki bru, oo da em u haka kaam saiñ hima sima wei waka Congress hadooh katni ymtoh neibynta u myntoi ya oo waka yung ka sem tangwa kwah u wa i chakri wow e u cha ki paidbah toh yow myntoilang waroh.
Heijooh i por ong u toh u pyrkhat wa ka Congress lada jop wei em ko haka Liang Pyrchah leh, du ka donhi kawa ye u yada.
Pynkut u yei klam deiwa ong lada ka Congress khlan ko ka jaitbru neh ko, lada ka Congress tlot ko ka jaitbru yong i daw chah lehbeiñ ko.
Discussion about this post