Khliehriat: Ka Khliehriat Block Congress Committee hapoh i yahkhmat u Deibormi Syad, President ka Khliehriat Block Congress Committee wa ki arngut ki Working President, u Piwell Shylla wa u Thynda Sana da lai yachem ki yaka Ampareen Lyngdoh (MLA) East Shillong Constituency wei da e dorkhat yow pynsñiaw yei eh yong ki paidbah ha kani ka dorbar mang poisa ka wow sdang nadooh 13 tarik uni u bnai hajrong i duna sahep EAC wei wym em BDO wa pura ha artylli ki BDO Office kitæ ha Khliehriat C&RD wa Saipung C&RD. Ka Khliehriat Block Congress Committee da sñiawkhia ko chiboon hajrong i chahktah ki paidbah ka East Jaiñtia Hills District na ini i duna ki sahep haka District.
Ka Khliehriat Block Congress Committee da pynkymmoo ko wa ka East Jaiñtia Hills District da em ko 206 tylli ki chnong wei du soo ngut ki sahep sorkar kiwa pait ya waroh ar, ka Administrative wa Judicial. Hajrong ini i bynta, ki paidbah chong chnong ka District da chem ki yei eh chiboon, da dooh ki chiboon ki myntoi na kini ki yung krehkaam ka sorkar neibhah wa u EAC wa katni hap u wow kreh kam u Block Development Officer ha artylli ki C&RD wa kynthup yaka Saipung Block wa Khliehriat Block wei kamjooh kam u Magistrate First Class ha yungkachari (Judicial) ka Khliehriat.
Ka Khliehriat Block Congress Committee da sñiawkhia ko chiboon wei booh kylli ki yaka sorkar wa na iyi i daw wa ka sorkar ym pynbait ko wow thung EAC haka District wa ya ki BDO wa pura ha ki artylli ki C&RD wei kamjooh leh na iyi i daw wa da pynkhamti kaam chooh chooh ya ki EAC wow man kam ki BDO ha ka District.
Hajrong ini i bynta, ka Khliehriat Block Congress Committee da kyntu ko yaka sorkar wow pynbait noh ya ini i eh ki paidbah ka thaaiñ rap smat hapoh ka District neibynta i myntoi wa i suk ki paidbah deiwa phah sa arngut ki EAC ha yung krehkaam u Deputy Commissioner, EJH wei wow thung noh ya ki BDO wa pura ha kini ki artylli ki C&RD Block.
Ya kani ka kyrwoh da pynlait daka General Secretary ka Khliehriat Block Congress Committee ka Rimaya Manar.
Discussion about this post