U MLA ka North Shillong, u Adelbert Nongrum ynne hapoh ka yung dorbar da wanrah u ya ka Private Members’ Bill kawa e pyrtuid u ka Meghalaya Selection of Candidates for State Quota Seats to Higher Academic Courses Bill, 2023.
Hachwa wow wanrah ya kani, da ong u wa kani ymtoh ka sien nyngkong wa da wanrah u ya ka Private Members’ Bill heiwa ha u snem wa dadep da wanrah u ya ka Bill hajrong ka Agricultural Land Regulation kawa da chah kyntait chwa wow yoh laad u wow batai chaphang ka Bill.
Ha ka sien wa ar won ha ka dorbar wa khaddooh da wanrah u ya ka Bill yow tynyap noh ya ka aiñ Gaming Act ka sorkar kawa da chah kyntait tangwa ha kani won ka dorbar, ka sorkar da wanrah ko ya ka Bill yow tynyap noh ya kani ka jooh ka aiñ.
Ha ka sien wa le won da wanrah u ya ka phang yaklam wow pynkylla noh ya ka Reservation Policy wei da yatai bniah bha ya ka tangwa kani leh ym em ye ko wow lai chakhmat. Hadien chibnai won, ka High Court pynmih hukum wot ko wow pynkrehkaam noh ya ka Roster System.
Kamtæ da ong u wa kani ka Roster System da pynkulmar ko ya ki bru neibhah ka Reservation Policy ka jylla toh kawa em boon i duna wei lada neini chakhmat em won wa yaleh mukotduma ya ka bhah kiwa lai puræ Doctor, Engineer wa kiwi kam kini ki jait puræ deiwa pynemkaam ya ka Reservation Policy ye wow wanrah chooh chooh yei eh ya kiwa lai puræ ka jylla.
Hajrong ini da ong u toh u man kiwa da pynkhreh chwa ya i booh bhah neitbynta kiwa lai puræ deiwa kyrpaad ya waroh ki dkhot ka yung dorbar wym toh u pyrkhat ya ka Party wa ki Constituency tangwa wow e yei kyrchaan ya kani ka Bill wa da wanrah u kawa emkaam bha wow pynskem ya ka mynried kiwa lai puræ ka jylla.
Da kyrpaad u leh wa kam kiwa mihkhmat paidbah, kiwa chna aiñ wow leh yei kaam wa da pynkit ha ki.
Ya kani ka Bill da tyrwa da u Speaker hakhmat ka dorbar wa lada pdiang u wow wanrah ya ka hapoh ka dorbar chna aiñ heiwa ym em wa bien wow e yei kyrchaan kamtæ kani ka Bill da chah kyntait noh ko.
