Ka yung dorbar chna aiñ ka Meghalaya ynne da kyntait ko yaka Private Members’ Bill wa tip kam ka Meghalaya Lokayukta (Amendment) Bill 2024 wa da wanrah da u MLA ka North Shillong, u Adelbert Nongrum yow pynkylla yaka aiñ Meghalaya Lokayukta Act .
Hawa wanrah ya kani ka Private Members’ Bill, u Adelbert da ong u wa iwa emkaam kattæ toh wow wanrah yow em ka aiñ wa pait yaka jylla wa ki paidbah waroh.
Da ong u wa ka jylla Meghalaya da sahdien ko neidaw wa joor ki kaam baam tooh wei ki paidbah da chaniah ki haka Meghalaya Lokayukta wow kdoh u khoom yei kaam baam tooh.
Ha kini ki tayaaw wa dep da ong u wa i man laitlooid ka Lokayukta da em wa thmu wow pyndooh ki wei kattæ toh i por wow yada yei rukom krehkaam ka Lokayukta.
Da ong u wa i pynkylla ya kani ka aiñ lyngba ka Amendment Act 2021 da pyntlot ko yei rukom pynkrehkaam ka Meghalaya Lokayukta.
Kamtæ da ong u wa ini i wanrah u da ka Bill samen yong oo toh yow yaleh pyrchah ya ki kaam baam tooh deiwa pynkhlan yaka Meghalaya Lokayukta.
Da ong u leh wa da emkaam wow thap biang ya ki kyndon Lokpal waka Lokayukta kiwa da dep pyndam haka Amendment Act 2021, yow pyntikna wa ka aiñ Lokayukta wa katni u man sakhiat ko kattæ kamwa da booh da mang ya ka.
Neiliang u Lamphang ka yung dorbar, u Thomas A Sangma da booh u hakhmat ki dkhot lada pdiang namo ym pdiang ki ya kani heiwa kiwa boon ym bien ki wow pdiang ka kamtæ da chah kyntait noh kani ka Bill.
Discussion about this post