Jowai : Ka dorbar lyiur ka Jaiñtia Hills Autonomous District Council Jowai wa da pynman ynnin ka 26 da man ko kawa chongchit bha heiwa u ma Marki Mulieh MDC ka Jowai North da wanrah u ya ka Motion hapoh ka yung dorbar.
U ma Marki da kwah u wow yaklam hei yatoh wa i rukom krehkaam ka tnat bichaar (Judicial Department) yong ka JHADC tangwa neiliang ki kattu katni ngut ki MDC ka liang synchaar da pyrchah ki heiwa kammon u Marki wanrah u ya ka motion neibhah oo em u neiliang ka liang synchaar tæ kammon u klam pyrchah u ya ka EC.
Neiliang u ma Laitsing Shylla da ong u ya u Marki wa yeini ye u wow yaklam cha lait ka dorbar katwa u ma Richard Lyngdoh ym e laad hiwot u ya u Marki wow klam.
I daw wa ki MDC ym elaad ki ya u Marki wow klam hajrong ka phang toh neidaw wa u Marki da lai u neiliang ka liang synchaar tæ kammon u ye u wow klam pyrchah ya ka liang kawa em u.
Kamtæ u Chairman ka JHADC ma Arbor Hima Darnei da phah u ya ki MDC wow vote deiwa rah kti wa katwon ngut pyrchah ki yei wanrah u ma Marki heiwa waroh ki MDC da rah kti ki lait na u Ma Ri-ioo Sten uwa samen wa chong na liang pyrchah wei ym em hi wan u cha ka dorbar.
U CEM ka JHADC u Thombor Shiwat da pynbna u leh ya ka Official report hajrong ka chuki ksoh kaam ki MDC kiwa kynthup ya u Moonlight Pariat kam u Chairman Resources Mobilisation Committee katwa u Shanki Lyngdoh won kam u Vice Chairman, ka Voilet Lyngdoh kam ka Chairman Public Grievances Committee katwa u Chemhok Garod won u man u kam u Vice Chairman, u Richard Singh Lyngdoh kam u Chairman Rules Advisory Committee, u Laitsing Shylla Chairman Planning Board, u Suklang Shylla kam u Chairman Environment Committee wa u Bison Iano kam u Chairman Customary Law Committee.
Discussion about this post