U Lamphang ka Yung Dorbar Chna Aiñ, u Metbah Lyngdoh MLA da maham u wow leh da iwa eh pyrchah ya u MLA ka Nationalist Congress Party (NCP) na Gambegre, u Saleng A Sangma lada dang pynmih biang u ya ki ktien kiwa man pyrchah yei burom ka Yung Dorbar Chna Aiñ.
Ynnin kawa man ka sngi wa ar yong ka dorbar, u Lamphang da phah pyndam noh u ya ki kyntien wym yahaap hapoh ka dorbar wa da klam da u Saleng A Sangma ha i por wa ya chimbynta hawa yatai hajrong i long i man ki sarok wa i sahkut kari wa yei wym bood ya ki kyndon pynlai kari ha Shillong wa Tura.
U Metbah da ong u wa ini ym toh i sien wa nyngkong wa u Saleng da pynemkaam u ya ki ktien wym yahaap hapoh ka dorbar, wei da phah u wow pyndam leh ha itu i por wa klam sih u Saleng.
