U Symbood Montri Rangbah ka jylla uwa pait leh ya ka chnat PWD (Roads), u Prestone Tynsong da ong u wa i ngam yong u sarok ha Mawlai Bypass toh nei bor yong ka rymaw, wei toh i wym poi pyrkhat neibhah da wanrah leh chiboon i sih ha kiwi ki bynta ka jylla.
Da ong u wa ka yingkieñ kawa chna ha Mawlai Bypass toh kawa khlan bha, tangwa nei wan yong ka um wa khlan da ktah ko, wei da khana u wa da phah ya ki Engineer wow leh ki yeiwa emkaam khnang wow ye u wai smat ya utai u sarok.
Hawa kylli yei wym em ki dooid namo ki Side Drain, da ong u wa ka chnat da em ko i thmu wow pynbha biang ya katai ka sarok nadong chadong wei i lut i sep da phah pynbiang yow pynman ya katai ka surok kam ka Two-Lane.
Hawa yatoh wa i sih ki sarok ha kylleiñ ka jylla, u Prestone Tynsong da ong u wa hadooh katni ka chnat ym pu yoh lum ko hadooh katwon wa da sih ki surok wa ki yingkieñ nei wan u slapbah, tangwa da ong u wa i pyntip toh u lai chwa ko cha ki DC wei hadien ini daw lai pait yow chim yukheiñ yei lut neibynta wow pynchna ya ki sarok.
Hawa kylli, da ong u wow yada nei chah pynsih hei bor ka rymaw toh i wym ye, tangwa du wow pynkhreh wa lada em iwon iwon i jia hap wow leh smat iyi yow lait nei chah ktah i lai i wan.
