Chah pynbait u Ardent yeiwa ong u wa ka Reservation toh ya ki Khasi | I em le jaitbru toh iwa bakla: Ardent

U Symbood Montri Rangbah ka jylla, u Sniawbhalang Dhar ynne hapoh ka yung dorbar da yieñ u yow wanrah ya ka Point of Order hapoh ka Rule 300 i rukom pynlai dorbar yeiwa klam u MLA ka Nongkrem, u Ardent M Basiawmoit hawa chimbynta ha ka Short Duration Discussion hajrong ka Report ka Expert Committee heiyatoh wa ka Reservation Policy.

U Sniawbhalang da ong wa ini toh ha ka 25 tarik u February, heiwa u Ardent hawa chimbynta hei yaklam da pynemkaam u du da ya i kyntien Khasi khlem da pynemkaamlang ya ki Jaiñtia neibhah katkam ka Reservation Policy da klam che wa man ka bhah wa da booh neibynta ki Khasi wa Jaiñtia, kamtæ hawa yaklam ya ka Reservation Policy toh u ong Khasi Jaiñtia.

Hajrong ini, u Sniawbhalang da kyntu u ya u Speaker ka Assembly wow pynbait yeini deiwa booh ha ka Record wa toh u ong Khasi Jaiñtia hawa klam ya ka Reservation Policy.

U Ardent hawa jubab da ong u wa manda ong u ki Khasi oo tip hi u kiyi ki kitæ ki Khasi wei oo ym em u i thmu wa sih ya kawon kawon ka jaitbru tangwa oo da pynemkaam u yei ktien Khasi neibhah wa kwah u wow pynyatylli ya waroh ki jaitbru wa em hapoh ki Khasi yow lait u em iwon iwon i sñiawthooh bakla.

Related posts

Pynbna ka Pakistan da ka Open War pyrchah ya ka Afghanistan hadien wa yap 55 ngut ki chipai

February 27, 2026

E khublei ka Dorbar Chnong Mukhnang ya u Sniawbhalang Dhar

February 27, 2026

Da ong u leh wa kani ymtoh ka phang wa heh wei ym em poi pyrthat wa kat da u Montri sorkar u wanrah u kam kani.

U Ardent da ong u leh wa daw pteiñ u wow lai cha ki paidbah wa i toh kawi donhi ka jaitbru wei iwa pyrchang wow ong wa em le tylli ki jaitbru hapoh Meghalaya toh iwa bakla wei i man i kawi donhi lada toh ki Pnar, ki Khynriam, ki War wa kamtæ ter ter.

Hadien ini da yieñ leh sa u Wailadmiki Shylla kam u Montri sorkar wow ong wa ym em iwon iwon wow kdaw kti tangwa iwon iwon iwa da yaklam hapoh ka yung dorbar toh kiwa da neh kam ka Record wei lada pait ya ka Notification 1947 yong ka Reservation Policy da klam che Khasi wa Jaiñtia wei ym du ini hadooh ki kaam sorkar leh da pynemkaam ya ki kyntien Khasi wa Jaiñtia.

U Ardent da yieñ biang u wow ong wa pynemkaam hi u ya ki kyntien Khasi wa Jaiñtia tangwa kwah won wow pynemkaam du yei ktien Khasi yow yada na kiwon kiwon kiwa pyrchah wow phiah i.

U Speaker, u Thomas A Sangma hawa e yei rai da ong u wa da jooh pynemkaam bait Khasi wa Jaiñtia wei oo leh mynjur u wow pynbait yeini hapoh ka Record.