Neidaw wa em yoh COVID-19 ha Iongpiah, Jowai kamjooh wa em kiwa em hei maa wow yoh ya uni u khñiang namo ki High Risk Contact, kamtæ da emkaam wow leh yei booddien ya kiwa em hei maa, i leh Quarantine wei wow khangkset yow yada yaki paidbah nei poor uni u khñiang.
Heiyatoh wa ini, u District Magistrate ka West Jaiñtia Hills da pynmih hukum u ynne ka 28 tarik yow pynbna Micro Containment Area ya i yung wa i thaw (Compound) 1. Lamwan Pasweth, 2. Heisuk Kyndiah, 3. Pynhunlangki Toi kiwa em ha Iongpiah yow khang yei lai i wan wa khlem yoh bor cha wa na kini ki thaw nadooh pyrdi synyaw ka 28 tarik.
Kiwa em hapoh kini ki thaw toh u neh bait ki hapoh yung wei ym chang wow pynman yaki yalang paidbah. Waroh ki dukan toh u man kiwi kiwa khang kamjooh ki yung krehkaam sorkar deilang wa ki yong ki bru samen kiwa em hapoh kani ka Containment Area. Yeiwa emkaam u thied, daw yarap ki bru ki bor pynlai District.
Kani ka hukum ym em khang ko yei krehkaam ki bru wakreh Health, ki wakreh (Essential Worker) ka Jowai Municipal Board, ki laad pathai khubor, ki Petrol Pump wa i li booh yaki tadong LPG.
Ya kiwa leh pyrchah daw pynchitom katkam ka aiñ Disaster Management Act, 2005 wa IPC.
