Ka Union Public Service Commission (UPSC) ynne da pynbna ko wa da pyndam ko yei man IAS ka Puja Khedkar wei da khang leh ya ka wow yaleh biang ya ki Exam ka UPSC.
Ka UPSC da ujor ko da ka Police Case pyrchah ya ka Khedkar wa pynemkaam bakla ko ya ki kot ki sla ko heiwa da yaleh ko ya kani ka Exam boonsien palat yeiwa da chah deiwa pynkylla ya ka ID ko.
Hei takit ka UPSC ya 15,000 ngut kiwa da tyrwa da ka Civil Services Examination (CSE) yow man kam ki IAS nadooh u snem 2009 hadooh 2023 iwa mut 15 snem, ym em chem wa em kiwa wan yaleh ma yaleh palat yeiwa chah heiwa da chah 6 sien ya ki General Category hadooh wa em ki 32 snem, 9 sien ya ki OBC hadooh wa dap ki 35 snem katwa ya ki SC/ST ye ki u pyrchang katwa ye ki hadooh wa dap ki 37 snem.
I daw wym chem ki yeiwa leh ka Puja toh wa da pynkylla ko ym du yei pyrtuid ko tangwa wot i pyrtuid ka bei wa u pa ko, kamtæ ka UPSC da ong ko wa daw pynrkhiñ ki kyndon yow lait u jia biang ini.
Kamtæ da ong ini wa leh ka Puja toh iwa tyngkheiñ ya ka CSE-2022 Rules wei da pyndam noh yei man IAS ko wei da khang leh waroh chi rta wow yaleh ko ya kiwi kiwon ki Exam/Selection ka UPSC.
Heiyatoh wa ki Certificate OBC wa PwBD wa wanrah ka Puja, ka UPSC ong ko yeini ym ye ko wow ong neibhah ka pait donhi ko yow lait u em da kiwa chna thok wei ym ye wow lai pyntikna ya kawi pa kawi ka Certificate wa e kiwa yaleh Exam.
Chwa wow chim ya kani ka rai, ka UPSC da e por ko hadooh ynnin ka 30 tarik ya ka Puja wow pynche ko wei wow pynbiang ya ki kot ki sla tangwa ym em wan ko.
Ki pulit ka Delhi Police Crime Branch da dep ki wow pynngat kyndon ya ka Puja ha ka 19 tarik uni u bnai wa pyenkaam bakla ko ya ka Disability Certificate wa ka Other Backward Class (Non-Creamy Layer) yow yoh Quota ko hawa yaleh ya ka Civil Services Exam.
Da pynngat leh ya ka ha ki kyndon chna thok ya ki kot ki sla, i tyngkheiñ ya ka aiñ Rights of Persons with Disabilities Act wa ki kyndon ka Information Technology Act.
Discussion about this post