U Symbood Montri Rangbah uwa man leh kam u Montri wa pait ya ka chnat Parliamentary Affairs, u Prestone Tynsong, hapoh ka yung dorbar chna aiñ ynne ka sngi da yieñ u yow dawa pyndam noh napoh ka thup wa booh yukheiñ yei klam hapoh ka dorbar heiyatoh wa iwa da klam da u Dr. Mukul Sangma ynnin ka sngi.
U Prestone da ong u wa ini wa klam u Dr. Mukul man ko pyrchah yei rukom pynlai ya ka dorbar heiwa da pynbaad u ya u Montri Rangbah wa emkti u wa uwi u bru uwa da chah pynbaad kam u snar khayi drugs tangwa yeini pynbaad toh iwa khlem sabut.
Neiliang u Dr. Mukul da pynche u deiwa ong wa ym em pynbaad u wa emkti u Montri Rangbah wa uni u bru tangwa da ong donhi u wow syndong wa kiyi wa pynyatoh wa yajan i yow lait nei chah chim kabu.
U Conrad leh da yieñ u wow kylli lada u Mukul chwa u pynbaad u wa tip hi u mo wa kani ka Case pyrchah ya uni u bru kawa nadooh u snem 2013 toh kawa da dep pynkut wei uni u bru wa da dep chah kem da lait u na iwon iwon i chah pynngat ha ka aiñ wei ym em emkti u ha ki kaam wa chah pynbaad u.
Kam wow pynkynmoo wa u Dr. Mukul da sai u yei dur u Conrad wa chondur lang u wa uwi u bru uwa na Mizoram uwa da chah kem ha u 2013 deilang wa ki dawai kuli wa da khang da ka aiñ.
Neiliang u Lamphang ka yung dorbar da ong u ym ye u pdiang ya ini wa da pynbaad iwa khlem ki sabut, kamtæ katkam ki kyndon da phah pyndam noh ya waroh iwa da pynbaad wa iwa da klam da u Dr. Mukul napoh ka thup (Records) ka dorbar ynnin ka sngi heiwa u Dr. Mukul da pdiang u yeini deiwa ong wa daw leh u yeiwa emkaam yow pynbiang ya ki sabut.
Discussion about this post