Ka National Testing Agency (NTA) da pyndam ko ya ka NEET-UG 2026 Examination kawa dadep pynman ha ka 3 tarik uni u bnai May wei daw pynman biang ka sa chisien hadien wa mih i pynbaad wa lait tooh (Paper Leak) wei kamjooh hadien dawa wa ki manbei manpa, ki Coaching Institute, ki Liang Pyrchah wow pynman yei takit.
Ha ka Exam wa dang dep pynman, da em kamwa 22 lak ngut kiwa da yaleh ka kawa man leh kawi na ki waheh dooh ki Entrance Exam hapoh ka ri.
Iwa pynbna ka NTA ynne wan ko hadien wa i takit ki pulit ka Rajasthan wa em ka Paper Leak ka NEET-UG kattu katni sngi chwa wow pynman ya ka Exam.
Katkam wa takit ka Special Operations Group ki pulit, da chem ya ki Questions kiwa da thoh dei kti kiwa man kam ki “Guess Paper” heiwa na kini da em kiwa mih thij ha ka Exam Paper ka NEET-UG 2026.
Hawa pait ya kini ki Question wa thoh dei kti kiwa em kamwa 140 tylli kiwa poi hadooh 600 marks na ka 700 Total Marks, da chem wa em na kini kiwa mih wei em leh kiwa yasariem ha ka Exam Paper wei da em kiwa yoh ya kini Questions wa thoh dei kti kamwa ar-le sngi chwa u pynman ya ka Exam.
Hadien wa da chem iwa takit, neiliang ka NTA da ong ko wa hap pyndam noh ya ka Exam wa dadep pynman wei daw pynbna won ya ka tarik wa thymme ha ki sngi wow wan wei neiliang ka sorkar India leh da phah wow takit yeini da ka CBI.
Da pyntip leh wa ym khut wow leh Registration deiwi wei ki Exam Centre leh u neh ki kamjooh hi wei ym hap su bai Exam najrong kawa dadep su chwa, wei iwa dadep su daw pynuiñ biang ki.
Ki Admit Card won daw pynmih da kiwa thymme.
Discussion about this post