Le ngut ki bru napoh ka jylla Meghalaya ki wym pu yoh yei tipmit katkam ki kam wa da leh wa i sap wa em ki, da pynkup burom ya ki da ka Anuprerona, ka Riti Academy waka Media Plus haka yalang wa pynman ha Soso Tham Auditorium, State Central Library, Shillong ha ka 15 tarik uni u bnai deilang wa 8 ngut kiwa na Assam.
Ya kani ka yalang e khusnaam da wan wow embynta lang da u Paul Lyngdoh, Montri ka chnat Arts & Culture wa Tourism kam u kongsan deiwa emlang u Frederick Roy Kharkongor, Commissioner & Secretary ka chnat Arts & Culture wa u N Munish Singh, Zonal Director, Indian Council for Cultural Relations kam u symboon kongsan.
U Paul Lyngdoh da e yaroh u ya ini wa da leh yow tipmit ya kiwa em yei sap kiwa da leh chiboon neibynta i bha i miat ka imlang sahlang. Wei da kynmoo u leh ya ki rwai Khasi kiwa da rwai da kini kiwa yoh khusnaam ha kani ka sngi wei da kynmoo tympang u ya u Tanbor Swer, ya u Daminot J Wankhar waka Adlyne Khonglam kiwa da ya krehlang yow pynmih ya ka thup rwai yong ka seiñ KSU heipor wa yahkhmat u ya ka seiñ.
Ya u Tanbor Swer da pynkup burom da ka Rana Kharkongor Memorial Award, ya u Daminot J Wankhar waka Adlyne da pynkup burom da ka Riti Excellence Awards katwa ya kiwa na Assam da pynkup burom da ka Media Plus wei kini toh kiwa da lehbha ha i thoh i taar wa i chakri paidbah wei kini toh u Dr. Naren Hazarika, Sr. Journalist, Editor ka Daily Daindeen Barta, u Nang Anjana Gogoi, Advisor ka “Dauboria Barta” (Weekly News Magazine), u Sukleswar Nath, ka Ushamoni Saikia, Literature & Social Service, ka Alaka Bujar Baruah, kawa sikai skur, ka Manju Hazarika, kawa sikai skur, ka Inu Sarma wa u Sajan Bhuyan.
Ha kani ka sngi da em leh i tem i put na ki Na U Bnai, ka Saphina Kharhunai waka Aanya Kharhunai kiwa man ki ksu u Rana Kharkongor wei da pynwyrngai leh da u Tanbor Swer waka Adlyne Khonglam. Katwa kiwa wan na Assam da e ki yei chaad tynre wa kynthup yei chaad Bihu.
Kajiak chaphang kiwa yoh khusnaam:
U Tanbor Swer toh uwa thoh ya ki kyntien wa ki sur rwai Khasi tynre wa ka juk kawa katni uwa da chitrhem yeiwa leh u da palat 50 snem. Da man u leh wa da dep pynmih ya ki kattu katni ki thup rwai wei da tipmit leh ya oo da ka All India Radio wei chna u leh ya ki rwai pynmuja.
U Daminot J Wankhar toh uwa pliah bha u chna sur hadooh ki kyntien danda deiwa pynwandur yei rwai kiwa e mynsien wei wow pynkylla dur ya ka imlang sahlang.
Ka Adlyne Khonglam toh kawa em yei sur wa thiang iwa ye wow kyndeh yei mynsien wei kawa da thoh kot leh wei kawa da tipmit da ka All India Radio wa Doordarshan Kendra.
Discussion about this post