theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1
Advertisement ad1

Chah pynkup burom kiwa e snaam sñiawbha ha ka Blood Bank Jowai, da tam 1000 sien i e snaam ha uni u snem

Chirup wa ka ri waroh kawi, ka Jowai Civil Hospital Blood Bank Centre leh ynne da kynmoo warom ko ya ka National Voluntary Blood Donation Day (NVBDD) deiwa pynkup burom ya ki Voluntary Blood Donor Organization ha Conference Room ka Blood Bank Centre, Jowai.

Ya ka lehwarom National Voluntary Blood Donation Day da pynman da ka Jowai Civil Hospital Blood Centre chirup wa ka MACS wa NHM Meghalaya hajrong ka phang, “Donating Blood is an Act of Solidarity Joint Efforts and Save Lives” heiwa u MLA ka Jowai, u Waildmiki Shylla da man u kam u kongsan. 

Advertisement ad1

Ka Dr. Rita Pohrmen, Medical Superintendent, Ialong Civil Hospital, u Dr. Ramanand Prasad, Occupational Health Centre Dalmia Bharat Ltd, ka Dr. P. Shylla, Senior Doctor, In-Charge Jowai Civil Hospital Blood Centre, Panaliar wa kiwa jooh e snaam sñiawbha da em ki ha kani ka sngi. 

U Wailadmiki Shylla hawa e yei klam da e khublei u ya kiwa jooh e snaam neibhah ki Blood Bank Centre emkaam ki wow biang u dap i snaam ha ki khnang wow ye u e yarap ya ki bru.

Da sñiawsih u leh wow yoo wa kat kani ka sngi wa khroo em du kiwa jooh e snaam sñiawbha wa kiwa kreh kani ka Blood Bank Centre. 

Heijooh i por da e buit u leh ya ka Doctor In-Charge wow khut bru chooh wei khamtam ki khynnah skur wa College wow pynsñiawthooh yei emkaam wow e snaam neibhah dang boon bha ki bru kiwa ympu sñiawthooh yei myntoi wow e snaam deiwa kular u leh wow e yarap ya ki.

Ka Dr. R. Pohrmen, Medical Superintendent, Civil Hospital Ialong da e khublei ko ya kiwa e snaam sñiawbha neibhah wa i snaam man i iwa emkaam bha ha i doh i pran ki bru wei kammon ye i leh wow pynim ya ki bru. Da pynchlur ko leh ya kiwi wow e snaam langær neibhah ka Blood Bank emkaam ko wow biang i snaam.

Da ong ko leh wa i snaam yarap i ym du ya kiwi kiwa emkaam snaam tangwa kiwa e leh yoh ki yei doh iwa chait wa khlan. 

Ka NVBDD da lehwarom ya ka man-u-snem ha ka 1 tarik u Naichiphaw wow e khublei ya ki bru kiwa jooh e snaam sñiawbha. 

Da ong ko leh wa ha ka 17 tarik u Naikhynde ka Jowai Blood Bank Centre da chimbynta ko ha ka Mega Voluntary Blood Donation Drive-Raktdean Amrit Mahotsav ha WK Woodland Hospital, Sabahmuswang.

Ka Dr. P. Shylla, In-charge ka Jowai Blood Centre da e khublei ko ya kiwa e snaam sñiawbha cha ka Blood Bank Centre wei lyngba ka PowerPoint da khana ko kajiak ya i chakri ka Centre man-u-snem.

Ha u 2014 da em 167 sien ki kaam wa chakri ka Centre (67 sien kiwa e sñiawbha 100 sien kiwa e salan). 

Ha u 2015 won 338 sien (66 sien kiwa e sñiawbha wa 272 sien kiwa e salan), ha u  2016 da em 354 sien (103 sien kiwa e sñiawbha wa 251 sien kiwa e salan), ha u 2017- 696 sien (234 sien kiwa e sñiawbha wa 462 sien kiwa e salan), ha u 2018 – 885 sien (219 sien kiwa e sñiawbha wa 666 sien kiwa e salan), ha u 2019 – 801 sien (185 sien kiwa e sñiawbha wa 616 sien kiwa e salan), ha u 2020 – 871 sien (244 sien kiwa e sñiawbha wa 627 sien kiwa e salan), ha u 2021- 1057 sien (290 sien kiwa e sñiawbha wa 767 sien kiwa e salan), ha u 2022 (hadooh u Naikhynde) 1046 sien (331 sien kiwa e sñiawbha wa 715 sien kiwa e salan). 

Neiliang kiwa kreh ha Blood Bank Centre ynne da rwai ki leh yei sur sñiawngooh wa e pyrtuid ‘You have made a difference’.

Ya ka yalang ynne ka sngi da pynlai da ka Ianehskem Najiar, Data Entry Operator, Jowai Blood Bank katwa ki kyntien khublei won da e da u William Sumer, Lab Technician. 

Advertisement ad1
Share this:
Previous

SBSA Super Division: Psiah Final ka Latyrke SC waka Mulait United FC

Next

Da pynkup burom ya kiwa palat 80 snem i rta