Jowai: Ka chnong Sohkymphor Nein, ha kani ka 23 tarik wa da dep da pynkup burom ko ya u MDC ka UDP naka 20-Muthlong-Sohkymphor u Lomris Lyngdoh, wei ha kani ka sngi da emlang leh u MDC ka Rymbai-Khliehriat, u Finelyness Bareh uwa man kam u President ka UDP East Jaiñtia Hills District.
Ha ka tai ka sngi da em ka yalang wa tbian wa pynlai da u Ninglos Lyngdoh wei da yoh ya ki ktien kyrkhu khyrdoh ya u kyrtong wa da jop na kani ka Constituency da u Waheh Shnong ka Sohkymphor u Kronilios Lyngdoh, na ka manbei ka Chianti Lyngdoh, u Besterly Lapasam Ex-Waheh Chnong Sohkymphor wa na u Wanbiang Shadap Ex-MDC wa na u Finelyness Bareh MDC.
U Lomris hawa e yei klam ha kani ka sngi da ong u wa nachwa oo jooh man u kam u waheh chnong kani ka chnong wei da e u ya ka chakri kawa paka cha ka chnong wei i thrang yong oo toh wow chakri chooh chooh ya ki paidbah ka chnong kamtæ da yakhun MDC u ha kani ka kynti neibynta wow yoh u e ka chakri kawa rap bha cha ki paidbah. Kamtæ neiliang yong oo da khut lang u leh ya kiwa ym em kyrchaan ya oo ha kani ka Election wa da dep wow ya krehlang neibynta i bha i miat yong ka Constituency hi waroh kawi.
Neiliang ka Chianti da ong ko wa ka chnong dap ko dei sñiawkmen wei sñiawsarong wow yoh ya uwa mihkhmat næ u MDC uwa na kani hi ka chnong Sohkymphor Nein, ka wa ym pu jooh em wa jop MDC da slem bha ki por.
Ha kani ka sngi pynkup burom da emlang leh u Heiplanmi Talang uwa man kam u Adviser, u Iowanki Lyngdoh Secretary Shnong, u Ricky Lyngdoh dkhot chnong, ki paidbah, ka lok u Lomris Lyngdoh, ka Kleris Suchiang wa kiwa ha yung ha sem kamjooh kiwi de kiwa da chah khut sñiawbha.
Discussion about this post