theme-sticky-logo-alt
theme-logo-alt
Advertisement ad1
Advertisement ad1

Chah pynkup burom uwa na West Jaiñtia uwa chna ya ka kor pynkha khon syiar

U Forme Kharsahnoh uwa naka chnong Sohphoh, West Jaiñtia Hills District uwa da ieh yei kaam sikai deiwa kyruiñ khmat cha ki kaam rep kaam riang, uwa man leh u warep wa chem nongkong yaka kor pynkha khon syiar lyngba ki pylleiñ iwa yahaap katkam i man i long yong ka thaaiñ næ ka jylla, kamtæ ynne ka sngi neiliang ka chnat krehkaam yong u District A.H. & Veterinary Officer, West Jaiñtia Hills District, Jowai chirup i krehlang wa ka Hills Farmers Union, Thadlaskeiñ da pynkup burom ki ya oo yei chemphang yong oo iwa da wanrah burom ym du ya oo samen tangwa wot yaka District waka jylla hi waroh kawi. 

Yeini i pynkup burom da leh ha yung krehkaam ka chnat u District A.H. & Veterinary Officer, West Jaiñtia Hills District, Mynthong Jowai hei emlang u Deputy Commissioner ka West Jaiñtia Hills District u Garod LSN Dykes, u Dolloi ka Elaka Jowai u Puramon Kynjing, ki Doctor waphær waphær yong kani ka chnat krehkaam najrong kiwi ha ka yalang wa pynlai da u Dr. D.I. Kjam, District A.H & Veterinary Officer West Jaiñtia Hills District.

Kam chibynta i pynkup burom, kani ka chnat krehkaam da e kti haroh ko cha oo da ka kor ah phlang (Chaff Cutter) khlem iwon iwon i su, kawa hei dor yaw da poi ko kamwa T. 12,000 tam ka wi.

Neiliang u Forme Kharsahnoh hawa e yei klam khana u hajrong i lai luti yong oo kam u warep wei kamjooh i poi yumut yong oo wow chna yaka kor pynkha syiar, neibhah yoo u wa i e laad yaka syiar bei u pna pdem ko yaki pylleiñ wym ye u pynroi yei boon ki syiar ha phylloh, wei boonsien ha ki syiar wa em cha i hi, ka syiar bei manda dep pooh khon ko pna yooh ko ya ki khon syiar wei yah ko cha madan neitæ yoh u slap ka la-ær neitæ boon hi yap noh ki. 

Khana u wa yaka kor pynkha syiar da sdang u wow chna dei yarap ka bor Internet heiwa da puræ u thij pa thij yei man i long ka pylleiñ, i man ka syiar, i man ka kor najrong wa kammon u pynkrehkaam. Wei Ini da chim por ya oo boon tylli ki snem, wei hei pyrchang boonsien dooh nong u hadooh wow jop i kaam.

“I chem yong nga ya kani ka kor ha iwi i liang man i jop neibynta ki kaam yong nga kam uwa ri syiar tangwa sñiawthooh O wym pu em man i jop lut yei eh,” da ong u Forme. 

Ya kani ka kor da pynemkaam da ki kynja Battery wei da chna u ha ki ar bynta, chi bynta deiwa krehkaam ko pyn da ka hi (Automatic) wei kawi wow leh da i hi (Manually).

Khana haroh u wa em u i thmu wow nangpynpliah chooh choh itæ toh u chna Fully Automatic næ i wow krehkaam ko pna ka yaka hi wa kynthup hadooh iwa yatoh waka bordiñ wei wow pynkhih yaki pylleiñ. 

Heijooh i por da pynsñiaw haroh u yei emkaam wa chaphrang khnang yow ye u wow pynheh chooh chooh yei kaam.

Neiliang u kongsan, u Garod LSN Dykes da kyntu u wow chimkhia yei kaam yow nang ku chaphrang wei i stat i chemphang u Forme da rah naam ko yaka District waka jylla hi waroh kawi, najrong wa kyntu haroh u wymtoh u booh yei sarom haphrang hawa pyrchang ya iwon iwon i kaam, tangwa u chim wa toh ka luti yow poi chei jop.

Kiwi won kiwa klam wa kynthup ya u Chanbor Rymbai, Secretary Hills Farmer Union Thadlaskeiñ, u General Secretary Hills Farmer Union, seiñbei Allfondbirth Kharsyntiew da e yaroh ki yei chemphang uni u waheh neibhah wow thied yaki kor wada chna cha kiwi won ki jylla ka ri chem chitom manda sih wei jynjar u yoh ya kiwa chna, najrong kiwa wan na baar ye ki wym yahaap wei man i long ka suiñbneiñ cha kani ka thaaiñ.

Share this:
Previous

Da chah u wai biang ki thaw dai kiad ha Shillong

Next

Dei phah pynlang jhep chah pynchitom kiwa noh jhep chapoh i thaw ka Raj Bhavan