U MLA ka Nongkrem, uwa man leh u President ka Voice of the People’s Party (VPP), u Ardent Miller Basaiawmoit da beiñ u yei rukom pynman dorbar mang tangka ha kani ka kynti deiwa ong wa kani ka dorbar toh kawa da leh embor neibhah ym em e laad ya ki MLA ka Liang Pyrchah wow wanrah ya ki phang wa kongsan kiwa ktah ya ki paidbah ka jylla.
Neiliang u Ardent uwa em ha ka Liang Pyrchah da pynsñiaw u yei chrai yei wym e laad wow yatai hapoh ka yung dorbar yei pynkrehkaam ya ka ‘Roster System’, heiwa da ong u wa kam ka Party ym yohsa ko wow mih noh cha sarok neibhah wa i kwah hi toh wow yatai hapoh ka yung dorbar ya kani ka phang wa ktah ya ki jaitbru hapoh ka jylla.
U Ardent da beiñ u leh yei pynkut syndet ya ka dorbar ynne ka sngi khlem ym pu toh por hadooh wym yoh de u wanrah ya ki phang namo ki Motion wa da pynkhreh khamtam hawa yatoh wa ka Roster System, i rukom pynkrehkaam ya ka Job Reservation Policy ha ki District.
Ha ka dorbar ynne ka sngi da em 8 tylli ki Motion ki wym em u yoh u yaklam neidaw wa pynkut syndet noh ya ka da u Speaker yow pteiñ won ha ka 27 tarik.
U Ardent da ong u leh wa emkaam bha u yaklam ya chiboon ki tkoh wa i duna hapoh ka Reservation Policy wei da kwah ki wow kdaw ha ka sorkar ya kini yow lait u mih i thut hapyrdi ki jaitbru wa chong chnong ka jylla.
Chooh chooh da ong u wa kani ka dorbar mang tangka toh kawa tbian dooh kawa du 7 sngi donhi, da e por du ar sngi ya ki Private Members Business wei i por leh da e du 10 minit wow klam wow yatai chaphang ka Governor’s Address kamjooh leh chaphang ka mang tangka wei ini man ko pyrchah yei synchaar paidbah kawa da leh embor wei ym jooh em chem u ya kam kani ka pynlai dorbar ha ki snem wa da man u kam u MLA.
Kamtæ da ong u wa ini i pyndam ya ka dorbar toh yow lait nei yaklam chaphang ka Roster System wei oo da dep thoh u cha ka sorkar wow dam chwa u pynkrehkaam ya ka deiwa kheiñ nadooh u snem 1972 yow lait ko u ktah ya ki khynroo khyllood wa yaleh kreh.
