Ha North Garo Hills District nadooh wa sdang uni u bnai da pynbna Micro Containment Zone ya ki yung ki sem wa em kiwa yoh COVID-19 wei kamjooh leh ya ki dukan lada em kiwa chongdai kiwa yoh ya uni u khñiang wei hadooh ynne ka sngi da dep wow pynbna ya ka 6 tylli kini ki Micro Containment Zone
Ha South West Garo Hills da hap wow khang ya ka OPD ka Zikzak PHC ar sngi itæ ha ka 8 wa 9 tarik uni u bnai neidaw wa em wa yoh COVID-19 ha kani ka thaw sumaar yow ye u booddien ya ki bru wa yachem pateiñ kamjooh yow yada ya ki paidbah.
Ha East Khasi Hills da pynbna ya ka Harijan Colony, Mawlonghat kam ka Containment Zone hadien wa em 2 ngut kiwa yoh COVID-19.
Ha Ri Bhoi District neidaw wa em 10 ngut kiwa yoh COVID-19 ha SBI Bank Nongpoh Branch, da phah khang ya ka nadooh ka 10 tarik uni u bnai hadooh ka 16 tarik uni u bnai wei da phah ya waroh kiwa wan cha kani ka Bank wow kset ki ya idæ 10 sngi.
Ha Ri Bhoi biang, da phah khang ya ka SBI Bank Umiam Branch nadooh ka 10 tarik uni u bnai hadooh ka 12 tarik neidaw wa em kiwa yoh COVID-19 ha kani ka chnat, kamtæ da phah ya ki bru wa wan cha kani ka Bank wow chong kset ki ya idæ 10 sngi wei wow pyntip lada yoh ki ya ki dak ki chin wa chitom.
Ha South West Khasi Hills District won neidaw wa em kiwa yoh COVID-19 ha ki le tylli ki chnong kitæ ka Domjajew, Sumsir wa Mawiong wei da em leh kiwa em hei maa wow yoh ya uni u khñiang da pynbna ya kini ki le tylli ki chnong kam ki Containment Area haka hukum wa pynmih haka 8 tarik uni u bna.