Ka KSU-Laban Circle da thoh ko cha u Chief Minister ka jylla, u Conrad K Sangma yow pyntip yei chah pyntieñ kiwa chong chnong ka Laban Pyllun ha ki bor District khamtam ya ki dkhot ka Joint Action Committee (JAC) kiwa da yakhih pyrchah ya ka Shillong Ropeway Project heiwa kiwa yahkhmat toh kiwa boon ki kynthai.
Ka seiñ da kdaw ko yeiwa jia ha ka 28 tarik uni u bnai heiwa ki dkhot ka JAC wa ki waheh chnong da mih i yania ki hapyrdi yong ki tangwa dadpoi da ki pulit deilang ki SOT ha kani ka thaw iwa man leh i pynyoo bor da ki bor District yow pyntieñ ya ki dkhot ka JAC yow dam ki u pynman yei yakhih.
Ka seiñ da ong ko wa ym em pyrchah ko ya iwon iwon i kreh ka sorkar tangwa emkaam wow yoh chwa yei mynjur ki paidbah heiwa ka sorkar da ong ko wa ym chah ktah ki tyllong um tangwa ki dkhot ka JAC won ong ki wa daw chah ktah i.
Wei kam ka seiñ da chem chitom ko wow chaniah ya ka sorkar hadien wa yoo yeiwa jia ha East Jaiñtia Hills heiyatoh wa ka Shree Cement heiwa kiwa pyrchah da chah pyndooh i hok yong ki wei thaw yong ki da chah knieh i hadooh wow poi u pood leh wow chah maham hadooh wow chah dat.
Ka seiñ da ong ko leh wa heiyatoh wa kani ka Ropeway da sñiaw ko wa daw em i chna sarok na Sericulture Farm chadooh Sawmer ha ki snem wow wan wei lada leh yeini daw hap u ah boon tylli ki dieñ iwa ye u ktah ya ki tyllong um.
Chooh chooh da ong wa ki bor District ym ye ki wow yut nei kamram ki heiwa da pynkit ha ki dorbar chnong wow pynman Public Hearing kamjooh wow pynche ki yei chah ktah deiwa em kani ka Ropeway neibhah yeini hap wow leh da ki Expert ha kni ki kaam wei man i kaamram ki bor District.
Da pynkut deiwa ong wa emkaam u pynku ya ki kaam uiñke suwari kamjooh i yoh khih yoh kreh tangwa hawa leh yeini ymtoh u chah ktah ka bei rymaw, kamtæ da kyntu ya u Chief Minister wow chimkhia u yeini.
Discussion about this post