Ka Meghalaya High Court da kyntait ko wow pyndam ya ka hukum phah sket ya uwi u bru uwa da kset hapoh ka District Jail Nongpoh uwa dadep chah rai pynrem yeiwa slaitbor u ya ka khon nah u kawa dang 10 snem i rta.
Ya uni u bru dadep rai pynrem ha ka 06-05-21 da ka Special Judge (POCSO), South West Khasi Hills District, Mawkyrwat deiwa phah kset patok deiwa pynchitom bha 24 snem hapoh ka Section 5(m)(n)/6 ka aiñ POCSO Act, 2012.
Da phah leh wow su cha kani ka khynnah Rs. 3 lak da ka Meghalaya State Legal Services Authority.
Kani ka khynnah toh kawa da chah slaitbor ha u pa nah ko ha ka 04-09-2016 heiwa da chem ya ka da ka bei ko heipor wa liwan ko cha yung heiwa da chah kdoh ko weiwa da wiar yongbru wei da hap wow kynjrait um ka yow khyrngiat ko.
Kani ka khynnah da khana ko wa da chah slaitbor, kamtæ da lai booh FIR ha ka Mawkyrwat Police Station ha ka 06-09-2016 heiwa da kem noh ya u pa nah.
Neiliang u muktiar uwa chah kset da ong u wym em biang ki sabut wow kset ya oo kamtæ hap pyndam noh ya ka hukum phah kset oo.
Hei pait ka High Court ya kani ka mukotduma da chem wa iwa jia ya kani ka khynnah toh ha ka sngi Sunday heipor wa ka bei ko ym em ko ha yung wei kani ka khynnah dang khreh ko u sum chwa wow lai cha yaseiñ heiwa da sai ko leh leh ki sula wa thymme chwa u sum wei heini i por u pa nah ko da ksoh wei da rah u cha thaw thiah heiwa da slaitbor u ka.
Hadien wa yaam wa kiad ko da thap u dei that ha ktien ko wei hadien won da maham u wow pynyap ka lada khana bru.
Uni u pa nah da kdoh u leh ya kani ka khynnah ha uwi u chrot dieñ wa em ha lait yung deiwa kdoh ya ki kti wa ki kjat ko wei da ieh u ka heini.
Ka bei ko da chem ko ya ka khon ko kamni deiwa chah kdoh wei yaplær wei mih snaam ko na ktien wa kjat wei hadien da pynkhyrngiat ko ya ka khon deiwa kynjrait um da lai sah ki cha ka yung kawa chipayu kani ka manbei. Ha ka sngi wa bood hadien wa yoh yarap poisa ko, da lai yah ko ya ka khon cha Mawkyrwat CHC heiwa dapoi ki dei miet heiwa kani ka khynnah da khana ko ha ka Doctor wa chah slaitbor ko.
Ha ka sngi wa bood won da lai yah ya ka khynnah cha Ganesh Das Hospital, Shillonh hadien wa phah ka Doctor heiwa da chah sumaar ko chitayaaw.
Ki Doctor leh da pyntikna ki wa da em ki dak ki chin wa kani ka khynnah da chah slaitbor ko.
Chooh chooh da chem leh wa uni u pa nah hawa takit ki pulit oo da phla u wa leh u yeini i kaam.
Kamtæ ka yung bichaar hadien wa pait ko ya waroh ki sabut da rai ko wow pynskem ya ka hukum phah kset ya uni u bru neibhah da tyngkheiñ u leh yei chaniah ka khon nah u ha oo pyn hapoh ka yung wa sah ki.
Ya kani ka rai ka High Court da pynmih ha ka 29 tarik uni u bnai.
Discussion about this post