Jowai: Ar ngut ki bru da chah dat ki hadooh wa yap ha ki paidbah neidaw wa suba wa ki toh kiwa tooh wa lute iwa da jia ynnin i step ka 15 tarik heipor 11 waje ha chnong Chanangpara, West Garo Hills.
Ini da jia nadooh wa sdang boon ki kaam tooh kaam lute cha kani ka thaaiñ wei kiwa chong chnong da sdang ki wow yang miet wei ha i step synaw ka 15 tarik le ngut ki bru da psiah ki chapoh kani ka chnong da kawi ka kari Maruti Alto wei da chah pynsangeh ki ha kiwa yang chnong kiwa da suba toh kiwa tooh wa lute.
Da sdang joor chooh chooh i suba ya kini ki le ngut hadien wa chem ya ki wait (Dao) hapoh kari.
Kamtæ da kem ya kini ki le ngut wei da booh ya ki ha yung u Nokma kani ka chnong.
Hei step manda tip ki paidbah wa kini ki le ngut em ki ha yung u Nokma da wan ki da ki hajar ngut wei da sai ki ya kini ki le ngut wei da dat yong lang ya ki heiwa u Mokibul Akond na chnong Kalirthan wa em hapoh ka Phulbari PS ha West Garo Hills (WGH) wa u Mikseng Marak na Dawagre da khlaad ki katwa u Bita Rabha na Dawagittinggre, Williamnagar, East Garo Hills da mynsoo joor u wei da kit ya oo cha i thaw sumaar.
U Akond toh uwa da jooh chah kem wa emkti u ha ki kaam rahbor ya ki bru wei dang pyrchang ki pulit wow chemdien lada sa ki arngut leh toh kiwa da jooh tyngkheiñ aiñ.
Ki pulit manda poi ki ha ini i thaw yow pynlait ya kini ki le ngut da chem ki wa da em kamwa 3000-4000 ngut ki bru kiwa dat ya kini ki bru wei ym ap ki ya ki pulit wei pteiñ ki wow dat ya kini ki bru. Ki pulit dang pynman ki ya ka takit yow chemdien wa lada kini ki le ngut lai luti donhi ki na kani ka chnong namo kiwa khayi kwai næ kiwa lute.
Discussion about this post