Kiwa chong chnong ka Patharkandi wa em ha Sribhumi District ka Assam, da chong sier mynsien ki ynne ka sngi hadien wa chem yei metyap u dkhot ka BJP uwa man kam u Booth President, u Bikash Dhar, uwa da wiar nadooh ka 12 tarik uni u bnai na i chnong Jogichhara wa em ha khappood ka Assam-Tripura.
Katkam ka khubor wa da mih, da em wa khut ya u Dhar na yung da ki bru wym tipmit wei hadien ini da pleh ka Mobile Phone u wei ym tip de cheiwon em u. Kamtæ ka yung ka sem u da lai pyntip ki cha ki pulit yeini wa wiar u.
I thooh ya u Dhar da pteiñ i hadooh ynne i step heiwa da chem yei metyap u na Jogichhara, iwa man i chnong wa em ha khappood ka Assam-Tripura wei ki pulit da pyntip ki wa da chem boon ki dak takha hei doh i pran iwa ye u man wa yap u deiwa chah pynchitom.
Hadien wa tip ki paidbah wa chem yei metyap u Dhar, kiwa kyrchaan yong oo da lai leh pynsih ki wei da thang ki leh ya ki dukan wa em ha Chagalmowa, Bazaricherra wa kiwi de kiwa em chajan. Da em leh ki bru wa da rah deilang ki dieñ kiwa da mih cha luti syngkeiñ.
Heiyatoh wa ini, ki pulit da kem ki ya 6 ngut ki bru wei uwi na ki da tip kam u Abdul Haque, uwa da pyrchang u yut chwa wow mut ki pulit wow kem oo.
Ki pulit da ong ki wa u Abdul da tba kti u wot ya ki pulit heipor wa mut u wow yut hadooh wa hap wow siat oo ha kjat yow ye u kem oo.
U Abdul toh uwa da yut cha Tripura tangwa da chemdien ki pulit oo.
Yei metyap u Dhar da phah cha Silchar Medical College and Hospital yow leh ya ka Post-Mortem Examination.
Ki pulit ym pu em khana ki leh yei pyrtuid ki waroh kiwa chah kem wa suba emkti ha ini i kaam.
Discussion about this post