Ki pulit ka Ahmedabad, Gujarat da ye ki wow kem ya ar ngut kiwa emkti wow pynyap ya u bru uwa na Assam uwa tip kam u Mohibul hadien san bnai wa chem yei metyap wa da chah thang i dur na uwi u dooid wa em ha thaaiñ Changodar ka Ahmedabad ha u bnai Wisu (March).
I takit ki pulit da chem wa hadien wa mut ki wow pynyap ya u Mohibul deiwa ksih da u Zip Tie, tangwa neidaw wa tkut u, da sai ki pyn da ki tylle juti u Mohibul yow ksih oo hadooh wa yap.
Yow lait ki bru wow tipmit ya u Mohibul, da looid ki ya ki sula u wei da tymmoh ki da ka T-Shirt yei khmat u dep tæ thang ki ka. Da pyrchang ki leh wow noh yei metyap ha ka luti rel tangwa ym ye ki wei khaddooh da noh ki yei metyap hapoh uwi u dooid.
Yei metyap da chem ha ka 16-03-25 hadien wa yoh ujor wa da wiar u wei yeini i metyap wa da joor bha i mong i chah leh pynsih da chem na u dooid wa em hajan ka luti rel ha thaaiñ Changodar iwa man i thaw wa em ha rood ka sor Ahmedabad.
Yei metyap da ye wow pyntikna toh i yong u Mohibul uwa kreh wa ka MaxGraphics Company kawa em ha Tajpur Road, Changodar wei kiwa ha-yung u da lai ujor ki hadien wa wiar u khlem da wan kreh.
Hei takit ki pulit da chem yei kha ha rdang i metyap u Mohibul wei da chemdien ya kiwa emkti hadien wa syndet-syndet em wa pynemkaam ya ka SIM Card u. Kamtæ da ye wow chem ya kini kiwa emkti wei da lai kem ya ar ngut kiwa da phla yeini wa leh ki.
Kini ki ar ngut wa pynyap ya u Mohibul toh ki lok hi u wei u Mohibul da jooh khana u ya ki wa oo em u boon bha ka poisa wei em u leh boon i thaw ha Assam wei ini da pynman ya ki wow pynyap oo.
Kini kiwa pynyap toh kiwa tip kam u Santlal Gautam wa u Rohitsinh Gaud wei i thmu yong ki toh wow lute oo u Mohibul wei ha katai ka sngi wa jia da lai ke ki cha rood ka luti rel wei nyngkong da pyrchang ki wow ksih oo da u Zip Tie tangwa tkut u wei da looid ki ya u tylle juti u Mohibul yow ksih oo.
Hadien wa pynyap ki oo da pyrchang ki wow noh yei metyap ha luti rel yow chah yooh u tangwa ym ye, kamtæ da looid ki ya ki sula u wei ya ka T-Shirt u da tymmoh yei dur khmat u dep tæ thang ki ka yow lait ki bru wow tipmit oo wei da noh ki yei metyap hapoh dooid ha ka 06-03-25 katwa yei metyap da chem ha ka 16-03-25 da ki bru paidbah.
I suk ki pulit u chem ya kiwa emkti toh neidaw wa tooh ki ka Mobile Phone u Mohibul wei hadien boon bnai pynemkaam ki ka.
I thmu ki toh hadien wa pynyap yow lai sai poisa Rs. 2 lak na ka Bank Account u Mohibul.
Discussion about this post