Ynnin i janmiet ka 12 tarik da em wa pyntip cha ki pulit wa heipor 3:00 waje i sngi uwi u bru wa tip kam u Masoom Choudhary da chah rahbor u ha ki 5-6 ngut ki bru da ka Local Taxi wa em u Number ML-11-7172.
Mar heitæ waroh ki pulit ka East Jaiñtia Hills da kreh ki wow pynlait ya uni u bru, wei heipor 4:30 da yoh u pynlait ya oo da ki pulit ka Khliehriat Police Station wei da yoh leh wow kem ya kiwa rahbor ya oo wei da wanrah ki cha Khliehriat Police Station.
Hadien wa takit da chem wa uni u bru wa chah rah toh uwa dai drugs wei da chem ya iwi i khieh sabon wa em Heroin wa lai e u cha kiwa rahbor ya oo kiwa da pynbait wow thied ya ini i drugs.
Kini ki bru wa rahbor oo da kit ki ya oo cha khloo wei da dawa ki T. 5 lak na u pa u yow pynlait noh ya oo.
Ya ini i drug da chem na ka kari (Local Taxi) wa da da kdaw haneiñ wa pynemkaam da kini kiwa rahbor.
Ini i drug Heroin wa yoh kem toh iwa khia 15 gms.
Kiwa chah kem wa kynthup lang ya uwa chah rahbor man ki kamni ha wah:
U Damewanhi Rymbai (28 snem), u Hilari Dkhar (24 snem), u Wanmi Muksor (30 snem), u Deimon Shadap (29 snem), u Deibor Sutnga (31 snem), u Banjop Sukhlain (25 snem) kiwa waroh na East Jaiñtia Hills wa u Massom Choudhary (20 snem) uwa na Katigorah Noonnagar, Assam.
Da kem leh ya 6 tylli ki Mobile Phone deilang waka Local Taxi.
