Shillong: Ka BJP Unit ka Meghalaya da yaroh ko yei pyrchang u Montri Rangbah ka ri wow pyndooh noh yei kaam baamtooh kamjooh ka poisa wa murieh naka sorkar kawa tip leh kam ka Black Money, da kyntu ko ya ki paidbah ka jylla yow man ki kiwa yaichah yow poi cha ka thong wa jop.
Da ong wa, ka BJP toh kawa pyrchah wei wym e laad ko ya ki kaam baamtooh hanlada katni da wanrah ko yei chitom ya ki paidbah, emkaam u krehlang waka sorkar sa du kamwa 40 sngi donhi wei ka daw pyrchang ko u leh katwa ye yow pynduna yei eh i khoo wa tyngkhooh ki paidbah ha kini ki sngi.
Ka BJP leh ong ko wa ka kwah ko u pynkynmoo ya ki paidbah wa ka sorkar NDA da kular ko ya ki paidbah wow lait ki na i chah kdoh ka ri ha ki kaam baamtooh yow wanrah yei khooid i suba hei synchaar khadar, kamtæ da chim ko ya ka rai wow pyndam noh ya ka poisa T. 500 wa T.1000.
Deiwa leh yeini ka sorkar daw ye ko u pynkrehkaam ya kiwa boon ki scheme wa da sdang ko ha kini ki ar snem. Kini ki scheme toh ki wow kyntu yei yoh i kot ki paidbah khamtam kiwa dooh.
Da ong leh wa ka ri India toh ka ri wa mahajon hei liang iwa da e ka rymaw ya ka tangwa ha ki 50 snem wa synchaar ka Congress waroh ini da chah riñ chah tooh ki na ki paidbah ha kiwa synchaar ya ki.
Kamtæ ka BJP da ong ko wa u Modi da leh u katkam i kular yong oo deiwa raikut yow pynmansakiat ya ka ri katkam wa da mutdur u wei ym toh u kut ko du hei kular donhi.
Discussion about this post