Ki pulit ka Goalpara hadien wa palat 14 kynta i kdong ya u bru wa da snar bha ha ki kaam pyrchah aiñ uwa tip kam u Amar Thapa uwa da emkti ha ki kaam dawa poisa, i rahbor ya ki bru, ki kaam pynyap bru wa kiwi kiwi de ha Assam wa Meghalaya, da yoh wow kem ya oo heipor pyrdi synyaw ynnin ka sngi.
Da yoh leh wow kem ya kawi ka 9 mm Pistol, 3 tylli ki kuli, 400 tylli ki dawai drug YABA deilang wa arngut ki bru yong oo.
Ya u Thapa da chem ya oo na i thaw rieh u wa em ha Rangjuli, Goalpara District wei da ye wow kem ya oo hadien wa em i yasiat heiwa da toh u kuli u Thapa heipor wa mut u wow yut na ini i thaw.
U Thapa toh uwa dang dep chah pynlait napoh patok (deiwa yoh jamin) na Meghalaya, da pyntip u SP ka Goalpara u VV Rakesh Reddy deiwa pyntip leh wa u Thapa da thmu u wow leh ya ki kaam rahbor wei hadien ki pulit da chemdien ki ya ini da ye ki wow kem ya oo na i thaw rieh u ha Rangjuli wei da pyrchang u wow yut cha i lyngkha wa em hadien yung u.
Heini i por wa yut u, da siat u leh ya ki pulit kiwa da siat kylla heiwa u Thapa da toh kuli u na kjat timun u.
Nadooh u Naisan uni u snem, da em hadooh 21 ngut ki bru kiwa da naam ha ki kaam pyrchah aiñ kiwa da dep chah pynyap ha ki pulit ka Assam wei awjan le dorjon kiwa da mynsoo nadooh wa wan ka sorkar thymme ka BJP heiwa u Montri Rangbah wa thymme ka Assam u Himanta Biswa Sarma da pynchlur u ya ki pulit wow pyndooh jait ya kiwa emkti ha ki kaam khayi drugs wa kiwi de ki kaam pyrchah aiñ.
