Ynne i step da em i yasiat hapyrdi ki bor pulit wa ki soo ngut ki damok ha khappood ka Meghalaya wa Assam ha i thaw wa tip kam i Ghiladubi ka Dhupdhara, Goalpara District, wei katkam wa ong u Goalpara Senior Superintendent of Police (SSP), u Nabaneet Mahanta kini ki bru da wan ki da kawi ka kari Renault Triber wa em Number AS-02AE-2633 heiwa manda pynsangeh ka da sdang ki wow siat wei da chem soo tylli ki Pistol wa san tylli ki Mobile Phone napoh kani ka kari.
U Mahanta da ong u wa i yasiat da man i hapyrdi kini ki damok wa ki pulit wei hapoh i yahkhmat u Nupur Ranjan Neog, u Co-District Superintendent of Police ka Dudhnoi wa u Abhilash Bora, CDSP ka Western Goalpara, ki pulit ka Dhupdhara wa Agia da ye ki wow yakhun pyrchah ya kini ki damok heiwa kini ki soo ngut ki damok da yap ki heini i yasiat.
Kini ki damok da tip kam u Zahidul Islam na Mukalmua, Nalbari District; u Saburuddin Ali na Larujan ka Boko; u Chengbart Sangma na Puthimari ka Krishnai wa u Mukunda Rabha na Chitukona-Damra ka Dudhnoi.
Ki pulit deiwa em wa pyntip yei lai i wan kini ki damok da booh thaw pynsangeh kari ki ha kiwa boon ki thaw wei manda poi ki hajan Ghiladubi da pyrchang ki wow yut deiwa siat ya ki pulit heiwa ki pulit leh da pynuiñ kuli wei manda kut i yasiat da pynkit ya kini ki soo ngut cha Adarsha Hospital, Dhupdhara heiwa ki Doctor da ong ki wa da yap ki, hadien ini won da phah cha Shaheed Nidhannuram Rajbanshi Civil Hospital, Goalpara wow leh ya ka Post-Mortem.
Kini ki damok da emkti ki hei tooh ha Tiplai, Dhupdhara heiwa da yang khap ki ha khappood Assam-Meghalaya wow rahbor ya ki heh spah.
Ya kini ki damok da thooh ki pulit heiyatoh wa kiwa boon tylli ki kaam pyrchah aiñ nadooh i tooh, i rahbor wa i tynyap bru wei da jooh chah kem teiñ ki.
Ha ini wa jia ynne i step, ka kari u Western Goalpara SSP leh da toh kuli ko ha ini i yasiat.
Discussion about this post