Kawi ka khynnah kynthai kawa dang khian rta da pynbaad ko wa da chah slaitbor ko ha ki le ngut ki bru ha kawi ka chnong ha sor Shillong, wei ya kini ki le ngut da tip pyrtuid kam u Kyntiewborlang Dkhar (19 snem), u Riskhem Nongsiej (27 snem) wa u Baskhembor Dkhar (27 snem) wei ya kini da kem da ki pulit ha ka 17 tarik uni u bnai.
Katkam wa pyntip u Superintendent of Police (City), u Herbert P Kharkongor, da ong wa ynnin ka 17 tarik, ki pulit da yoh ki ya ka ujor wa kawi ka khynnah wa dang 15 snem i rta da wiar ko na yung ha ka 16 tarik wei neiliang ka yung da thooh ki ka tangwa ym chem cheiwon cheiwon.
Tangwa hadien kattu katni por kani ka khynnah da liwan ko cha yung wei da khana ko wa da chah slaitbor ko ha ki le ngut.
Da pynbaad ko wa u Kyntiewborlang Dkhar da khut u ya ka ha kawi ka dukan yow chong baam wei da khut u leh ya ar ngut ki wym tipmit ko (u Riskhem wa u Baskhembor), wei kini ki bru toh kiwa da rahlang wei kiad.
Da khana ko wa u Kyntiewbor da leh khlemakor chwa u ya ka ha kawi ka thaw hadooh wym tip yong bru de ko, wei hadien wa da khyrngiat yong bru ko da lai booh biang u ka chei thaw sah.
Hadien wa yoh ya ka ujor, neiliang ki pulit da lai kem noh ki ya kini ki 3 ngut, heiwa da rah yow takit ki wei ynne ka sngi da lai yah cha ka yung kasari u Special Judge POCSO uwa da pynmih hukum yow kset ya waroh le ngut 14 sngi hapoh ka Judicial Custody.
Discussion about this post