Chah slaitbor kawi ha Malki, kem ki pulit ya uwi yut uwi won

Kawi ka khyllood da ujor FIR ko hapoh Laitumkhrah Police Station ya arngut ki chynrang deiwa pynbaad wa slaitbor ki ka.

Katkam ka khubor wa da yoh, ini da jia i ynnin ka 30 tarik ha Malki wei ya ka FIR da booh ynnin hi i miet.

Hadien wa yoh ya ka FIR, ynne ka sngi ki pulit da lai kem ki ya uwi uwa tip kam u Andy Malngiang (19 snem), katwa uwi won uwa tip pyrtuid kam u Kitbok Reuben Mawthoh da yut u wei ki pulit dang dang thooh ki ya uni.

Ya uwa chah kem da lai rah hakhmat ka District and Session Court wei da e bor wow booh oo hapoh ka Judicial Custody hadooh 14 sngi wei da pynngat hapoh ka kyndon 351(3)/70(1) yong ka BNS 2023.